Uıaly telefondardy tirkeý qashan bastalady
QR Aqparat jáne kommýnıkatsııalar mınıstri Dáýren Abaevtyń aıtýynsha, uıaly telefondardy tirkeý sharalary shilde aıynda bastalady.
"Negizi, barlyq protsedýralyq máseleler sheshilgen. Tirkeý sharalary shamamen jarty jylǵa sozylady. Degenmen, biz atalǵan jumysty barynsha ońtaılandyrýǵa tyrysamyz. Mysaly, abonentke SMS-xabarlama keledi. Ol óz kelisimin berse boldy. Ol jaǵynan qıyndyqtar bolsa, jaqyn jerdegi uıaly baılanys keńsesine barý qajet. Sosyn onlaın tirkeý qyzmetin de iske qosýdy josparlap otyrmyz. Menińshe, jyldyń aıaǵyna deıin bárin oıdaǵydaı sheshemiz", - dedi D.Abaev xalyqqa esep berý kezdesýinde.
Aıta keteıik, búgin mınıstr Abaev kelesi jyly tirkelmegen telefondarǵa uıaly baılanystyń qosylmaıtynyn taǵy bir márte eske saldy.
"Osydan eki jyl buryn uıaly telefondady tirkeýdiń jańa erejeleri qabyldanǵan bolatyn. Sodan beri arnaıy aqparattyq júıe ázirlendi. Ony iske asyrýdyń arqasynda uıaly telefondardyń urlyǵyn aıtarlyqtaı azaıtýǵa bolady. Sebebi ishki ister organdary urlanǵan telefondy IMEI-kod arqyly birden buǵattaı alady.
"Degenmen, IMEI-kodtyń kómegimen telefon ıesin anyqtaý qıyn bolyp tur. Al jańa normany tolyqqandy iske qosý úshin IMEI-kodty adamnyń jeke sáıkestendirý nómirimen, sondaı-aq, telefon nómirimen baılanystyrý qajet. Osylaısha, uıaly baılanys paıdalanýshylary 2018 jyldyń aıaǵyna deıin óz qurylǵylaryn tirkep qoıýy qajet. Sebebi 2019 jyly 1 qańtardan bastap tirkelmegen abonentterge qyzmet kórsetilmeıdi", - dep atap kórsetti D.Abaev.