Uıaly telefondaǵy «SOS» fýnktsııasynyń artyqshylyǵy qandaı

ASTANA. QazAqparat - QR Bas prokýratýrasy quqyqtyq statıstıka jáne arnaıy esepke alý jónindegi komıtettiń tóraǵasy Qaırat Jaqypbaev aldaǵy josparlary týraly aıtyp berdi, dep xabarlaıdy QazAqparat tilshisi.

Onyń aıtýynsha, aldaǵy ýaqytta komıtettiń aqparattyq júıelerine barlyq beıne baqylaý kameralaryn qosý josparlanǵan. Oǵan ákimdikterdiń, memlekettik jáne jeke menshik kompanııalardyń, tipti, jeke tulǵalardyń kameralary qosylady. Al «e-kýáger» degen elektrondy júıe barlyq beınejazbalarǵa taldaý jasap, tártip buzýshylyqtardy avtomatty túrde anyqtaıtyn bolady.

«Bıznesmender jáne qarapaıym xalyq smartfonǵa «SOS» fýnktsııasyn ornatyp, polıtsııany shuǵyl shaqyrta alady. Osy jartyjyldyqta jańa júıeniń prototıpi Oral qalasynda engiziledi. Qazir Batys Qazaqstan oblysynyń prokýratýrasymen jáne jergilikti ákimdikpen tıisti jumystar pysyqtalyp jatyr. Kelesi jylda atalǵan bastamany pılottyq negizde qolǵa alamyz», - dedi Q.Jaqypbaev Bas prokýratýranyń  alqa májilisinde.

Komıtet basshysynyń sózine qaraǵanda, ótken aıdyń sońynda «e-aryz» elektrondy júıesi pılottyq negizde qolǵa alyndy. Sonyń arqasynda prokýrorlar xalyq tarapynan túsken aryzdarmen jumys jasaýdy baqylap, ózekti degen máselelerdi anyqtaı alady. Memlekettik organdardyń reıtıngisin de jasaýǵa bolady.

Aıta keteıik, alqa májilisi kezinde akademııa basshysy atalǵan oqý ornynyń kemshin tustaryn jarııalady. Onyń aıtýynsha, akademııa qyzmetkerleriniń kásibı daıyndyǵyn jan-jaqty tekserip shyǵý qajet. Sebebi mamandardyń aýysýy jıilep ketti. Úsh jyldyń ishinde atalǵan kórsetkish 60 protsentti qurady. «Eńbek tártibi osal. Árbir ekinshi qyzmetker «bolnıchnyıda» júrdi. Al keıbir qyzmetkerler bir jylda eki ret emes, 8-10 ret «aýyryp» shyǵady. Bunyń barlyǵy kúndelikti nársege aınaldy. Sosyn akademııada úsh jyl istese, kiretin esikti de bilmeıtin qyzmetkerler bar», - dep atap kórsetti E.Merzadınov.Onyń oıynsha, "Bolashaq" baǵdarlamasyn ózgertý kerek.