Uıaly baılanys operatorlary ótken jylǵy ýádelerin oryndamady – ShQO ákimi

ÓSKEMEN. QazAqparat – Shyǵys Qazaqstan oblysynda aýyldarǵa ınternet tartý jumystaryn baqylaıtyn komıssııa quryldy, dep habarlaıdy QazAqparat tilshisi.

ShQO ákimi Danıal Ahmetov eldi mekenderdi ınternetpen qamtamasyz etý máselesi boıynsha jınalys ótkizdi.

«Tsıfrlyq damý, ınnovatsııalar jáne aeroǵarysh ónerkásibi mınıstrligimen 41 antenna-dińgek ornatý týraly kelisimge qol jetkizdik. Ókinishke qaraı, uıaly baılanys operatorlary ótken jylǵy ýádelerin tolyqtaı oryndamaǵan. Mysaly, «Mobaıl servıs» operatory ınternetti 33 aýylǵa tartýy tıis boldy. Biraq is júzinde tek jeteýine tartqan. «Skartel» operatory 29 aýylǵa ǵalamtor tartýdy josparlasa, tek 13-ine qosty. Bul baılanys operatorlarynyń úlken kemshiligi», - dedi aımaq basshysy.

Onyń aıtýynsha, qazirgi ýaqytta óńirde antenna-dińgekter ornatylatyn aýmaqtar anyqtalǵan. Jobalyq-smetalyq qujattama da daıyn.

«2022 jyly oblystyń júzden astam aýylyna ınternet tartylýy tıis. Bul jumystardy baqylaıtyn turaqty komıssııa quryldy», - dedi Shyǵys Qazaqstan oblysynyń ákimi.

Esterińizge sala ketsek, osyǵan deıin ShQO-daǵy 482 aýylda ınternet jyldamdyǵy baıaý ekendigin habarlaǵan edik.