Uıaly baılanys adam densaýlyǵy men qorshaǵan ortaǵa áser etpeıdi - zertteý

ASTANA. QazAqparat – QR Premer-Mınıstri Álıhan Smaıylov uıaly baılanystyń adam densaýlyǵyna áseri týraly Májilis depýtattarynyń saýalyna jaýap berdi, dep habarlaıdy QazAqparat tilshisi.

«Aldyńǵy qatarly elderdiń (AQSh, Kanada, Ulybrıtanııa, Shveıtsarııa, Ispanııa, Norvegııa, Jańa Zelandııa, Nıderland, Germanııa, Fınlıandııa, Belgııa, Aýstralııa) halyqaralyq ınstıtýttary men uıymdary (ICNIRP, WHO, IEEE, ITU, IARC, IEC, EU) elektromagnıt óristeriniń adam densaýlyǵyna áseri máselelerin muqııat zerttep jatyr», - delingen Álıhan Smaıylov jaýabynda.

Ol 2022 jylǵy 6-8 qyrkúıekte Astana qalasynda 5G/IMT-2020 jelilerin iske qosý máseleleri boıynsha Halyqaralyq elektrbaılanys odaǵy trenıng ótkizgenin atap ótti.

Onyń aıasynda sheteldik sarapshylar 1995-2018 jyldar aralyǵynda mobıldi kommýnıkatsııalarǵa júrgizilgen zertteýdiń (2 myń 900-den astam zertteý) qorytyndysyn jáne adamǵa elektromagnıt órisiniń áserin zertteýge arnalǵan 30 myńǵa jýyq maqala jarııalaǵanyn eske saldy.

«Uıaly baılanystyń radıojıilik elektromagnıt óristeri tolqynynyń adam densaýlyǵy men qorshaǵan ortaǵa tıgizetin keri áserine qatysty júrgizilgen halyqaralyq zertteýler olardyń arasynan tikeleı baılanys tappady», - dedi Úkimet basshysy.