Úı janýarlaryn chıpteý ıeleriniń jaýapkershiligi máselesin sheshpeıdi – depýtat
Búgin Májilistiń Ekologııa máseleleri jáne tabıǵat paıdalaný komıteti «Janýarlarǵa jaýapkershilikpen qaraý týraly» Qazaqstan Respýblıkasynyń Zańyna ózgerister men tolyqtyrýlar engizý máselelerine arnalǵan dóńgelek ústel ótti.
«2023 jyldyń 1 qyrkúıeginen úı janýarlaryn chıpteý kerek boldy, ıaǵnı ıeleriniń jaýapkershilik júkteý úshin, sońynda ne boldy? Statıstıka boıynsha 28 myńǵa jýyq ıtti tirkegen, bir jyldan keıin olardyń sany 4 myńǵa deıin qysqardy, al qazir 900-ge jýyq. Demek ıeleri úı janýarlaryn kóshege laqtyra salady degen sóz», - dedi Edil Jańbyrshın «Janýarlarǵa jaýapkershilikpen qaraý týraly» zańǵa ózgerister men tolyqtyrýlar engizý máselesine arnalǵan dóńgelek ústel barysynda.
Depýtattyń aıtýynsha, elimizde qańǵybas ıtterdiń sany artyp keledi.
«Biz ıelerinen jaýapkershilikti talap ete bastaǵanda, olar ıtter men mysyqtardy syrtqa laqtyra bastady, al olardyń sany artyp keledi. Sondyqtan munda kemshin tustar bar. Biz jaýapkershilikti kúsheıtemiz jáne arttyramyz dep otyrmyz, al ıeleri olardy laqtyrady, muny statıstıka kórsetip otyr. Sondyqtan úı janýarlaryn chıpteý arqyly biz jaýapkershilik máselesin sheshe almaımyz», - dep tolyqtyrdy depýtat.
Buǵan deıin Májilis depýtaty Erbolat Satybaldın qańǵybas ıtterdi bir mezette aýlap, zararsyzdandyrýǵa 15 mlrd teńgedeı qarjy qajettigin aıtqan edi.
Eske sala ketsek, jyl basynda Ekologııa jáne tabıǵı resýrstar mınıstri Erlan Nysanbaev eldi mekenderde buralqy ıtterdiń kóbeıýi turǵyndarǵa qaýip tóndirip otyrǵanyn aıtqan edi.