Úı-ishimizben qoshtasyp shyǵamyz: Jol azabyn tartqan aqtóbelikter kómek surady

<p>Aqtóbe oblysy Áıteke bı aýdany Tumabulaq aýylynyń turǵyndary 50 shaqyrym joldy 3-4 saǵat júrip ótedi, keıde tótenshe jaǵdaılar qyzmetinen kómek suraýǵa májbúr. Naýqas adamdy ortalyqqa jetkizý kezinde kóp qıyndyq kóredi. Keıde azyq-túlik jetkize almaı qalatyn turǵyndar ákimdikten kómek surady, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Aqtóbe oblysy Áıteke bı aýdanynyń Tumabulaq aýylyna aparar jolda toqtaýsyz jańbyr jaýyp, qatynas qıyndady.

Aýyl turǵandary kóktem men kúzde, jazdyń jańbyrly kúninde qatynas múlde toqtap qalatynyn aıtady. Al qysta joldy qar basyp qalady.

— Tumabulaq aýyly aýdan ortalyǵynan 110 shaqyrym qashyqta ornalasqan. Joldaǵy Sarat aýylyna deıin jol bar, al bizdiń aýylǵa áli salynbaı, qıyndyq týǵyzyp tur. Biz 50 shaqyrym jolǵa 4-5 saǵat júrdik. Kólikti ıteremiz, balshyqtan shyǵaryp jiberip, ózimiz jaıaý júrip, keıin qaıta minemiz. Qyzylkebir jerinde jol joq, bolsa da júrýge jaramsyz. Jazda aqjaýyn bolsa 2-3 qatynas toqtaıdy, — dedi aýyl turǵyny Áljan Ákimjanov.

Al aýyl balalaryn jattyqtyryp júrgen Toqsanbaı Aıtmaǵambetovtiń aıtýynsha, aýyl adamdary bir-birine habarlasyp, aqyldasyp, jolǵa shyǵyp júr.

— Sazǵa sý sińbeıdi, jańbyr bolǵan kúni jınalyp turady. Qıyrshyq tas ta tósegen emes. Qyzylkebirde kólikten tússeń, aıaǵyńa aıaq kıim bolyp jabysyp qalady. Kólikke de jabysyp, júrgizbeıdi. Keıde bir apta boıy aýyldan shyǵa almaı qalyp, azyq-túlik te bolmaı qalady. Ekiniń birinde Ýaz, Jeep joq. Jeńil kólik bolsa, birden turyp qalady. Aýyl aqsaqaldary oblys ákimine hat jazyp, aparyp ta berdi. Ótkende kelinshegim aýyryp qalyp, tórt saǵatta áreń jettik aýdan ortalyǵyna, — dedi ol.

Al aýylda azyq-túlik dúkeni bar jeke kásipker Murat Rahetov bolsa, keıde otbasymen qoshtasyp, jolǵa shyǵady.

— Jol joq bizde. Trassanyń ústinde júrý múmkin emes. Kólikpen bir-birimizdi súırep júrmiz. Keshe kólik tartýǵa múmkindik bolmaı, adamdar balshyq keship, arqan tartqandaı, kólik tarttyq. Jeńil kólikti sóıtip shyǵadyq. Jer jolǵa tússek kólikke asty tıedi. Qaıta miný de beınet. Aýyl jem de, kómir de almady. Aýdan ortalyǵynan tańǵy saǵat 7:30–da shyǵyp, aýylǵa 13:30–da keldik. Mynaý ne masqara? Balalar, áıelder bolǵanda qıyn. Óz basym qysta 112-ge habarlasyp, kómek ala almadym. «Bala bar ma, áıel bar ma» dep surady da, kelmedi ǵoı. Ondaı kezde tanys adam shaqyryp, qardy ózimiz kúredik. Men 2003 jyldan beri zat tasımyn. Keıde adamdar otbasymen qoshtasyn, vıdeohabarlama qaldyrady. Gaz ballonyn, baıpaq, kıim, tamaqty daıyndap, kúrek alyp, úımen qoshtasyp shyǵýǵa týraly keledi. Birneshe kólik birge shyǵyp, bir-birimizdi súıreı alsaq, bul jaqsy jetkenimiz. Al jolda qalyp 100 metrlep qar kúregenimiz, aman-saý jetkenimiz. Joldyń jyrynan kitap jazýǵa bolady, — dedi ol.

Tumabulaq aýylyna áli gaz kirgizilmegen. Kómirdiń bir tonnasy 40 myń teńgege jetken. Bul — oblys ortalyǵynan shamamen 1,5 ese qymbat baǵa.

— Jol jolyn aıtyp, jınalys jasaıdy. Qyryp, tegistep, qıyrshyq tas tósep beretinin aıtady. Keıin qaramaıdy. Kóktemde aýdan ákimdigine baryp, eskertý jasadym. Ol kezde emhanaǵa baryp, analız tapsyrýym kerek boldy. Aldyn ala jazylamyz, al biz ýaqytynda jete almaımyz. Buryn 4-5 dúken ıesi birge shyǵyp, birge baratyn edik. Qazir kóbi bankort bolyp, jabyldy. Ekeýi ǵana qaldy. GAZeldiń aldyna traktor kerek. Jylyna on úı kóshedi. 4-5 kúnniń ishinde eki úı ketti. Gaz dep aıtpaımyz, ot jaǵyp úırendik. Jol qajet bizge. Eki saǵattyń jolyna 4-5 saǵatymyz ketedi. Aýyrsa, aram ólýge bolady. Munda dárihana da joq. Adamdar qysqa dep qamdanyp, aldyn ala alyp keledi. Kóshege jaryq jaǵý úshin baǵana ornatty, biraq áli iske qospady, — dedi aýyl turǵyny Gúlnar Mustafaeva.

Áıteke bı aýdanynyń ákimdigi Tumabulaq aýylyna aparar kóterme jol qurylysy úshin 47 shaqyrymdy tórtke bólinip, jobalyq-smetalyq qujatyn ázirlep qoıǵanyn habarlady.

48-60, 60-72, 72-84,84-95,1 shaqyrym aralyǵyn salýǵa arnalǵan qujat saraptamadan da ótken.

Qujatty oblystyq jolaýshylar kóligi jáne avtomobıl joldary basqarmasyna tapsyryp, qarjylandyrý kútip otyr.