Úı mańynda qoqys jaqqan SQO turǵyny mal-múlkinen aıyryldy

PETROPAVL. QazAqparat – Soltústik Qazaqstan oblysynda órt qaýipti maýsym bastalǵaly 40-tan astam oqıǵa tirkeldi. Sonyń ishinde 8-i orman órti, al 10-y qýraǵan shópti jaǵý jaǵdaılary, dep habarlaıdy QazAqparat tilshisi.

Óńirlik kommýnıkatsııalar qyzmetinde SQO Tótenshe jaǵdaılar departamenti bastyǵynyń orynbasary Dmıtrıı Rastıhın óńirdegi órtke qatysty jaǵdaı týraly aıtty.

Sáýir aıynyń basynan ormandarda 8 órt bolyp, ot 31,8 ga aýmaqqa jaıyldy. Budan bólek, 210 ga jerde 200-den astam janý faktisi tirkeldi.

«Jalpy 5 sáýirden beri oblysta 40 órt shyqty. Turǵyndar úı mańynda, ásirese jeldi kúni qoqysty jaǵý asa qaýipti ekenin túsine bermeıdi. Máselen M.Jumabaev aýdanyndaǵy Báıterek aýdanynda órt qora-qopsydan shyqqan. Sol kúni jeldiń ekpini sekýndyna 28 metrge jetti. Saldarynan qora-qopsydan bólek turǵyn úı, jazǵy as úı, 2 garaj, otyn qora, monsha, VAZ-2106 jeńil kóligi men Ýral mototsıkli janyp ketti. Qorada turǵan shoshqa men 20 úı qoıanyn shyǵaryp úlgermegen. Órt jaıpaǵan aýmaq 278 sharshy metrdi qurady.

Osy aýdandaǵy Sarytomar aýylynda da dál osy kúni úlken órt boldy. Munda da turǵyn úı mańynda qoqys jaqqan. Ushqyn qoraǵa túsken, qatty jelden ol jaıylyp, baspana men qora-qopsy, 4 iri qara mal, 3 qoı jáne 25 taýyq janyp ketti. Órt sóndirýshiler jalyndy kórshi úıge jibermedi», - deıdi Dmıtrıı Rastıhın.