Úı ıesi mekenjaıyna tirkelgen bógde adamdy óz betinshe tirkeýden shyǵara alady

ASTANA. QazAqparat - Barlyq memlekettik organdardyń Mekenjaıdy tirkeý kodynyń (MTK) negizinde mekenjaı málimetteri biryńǵaı formatqa kóshedi, dep habarlaıdy QazAqparat ІІM baspasóz qyzmetine silteme jasap.

Búgingi kúni derekter bazasynda «Elektrondy úkimet» portaly arqyly tirkeýden shyǵarý qyzmeti engizilip otyr. Bul árbir jyljymaıtyn múlikke «elektrondy úı kitapshasyn» jasaýǵa múmkindik berdi.

Qazirgi ýaqytta óziniń mekenjaı málimetterin ár azamat qana emes, turǵyn úıdiń ıesi óz úıinde tirkelgen adamdarǵa da ala alady. Ol úshin HQO nemese «elektrondy úkimet» veb-portalyna júginse jetkilikti. 

Sonymen birge, mekenjaı boıynsha tirkelgender týraly anyqtama berý kezinde túrli máseleler týyndap jatyr. Mysaly, anyqtamada turǵyn úıdi alǵanǵa deıin tirkelgen adamdar (onyń ishinde qaıtys bolǵandar, respýblıkadan tys jerlerge kóship ketkender bar - avt.) kórinip turady. ІІM baspasóz qyzmetiniń málimetinshe, bul máseleler ótpeli kezeńde paıda boldy jáne ol ýaqytsha. Osyǵan baılanysty qaıtys bolǵandardy, Qazaqstan Respýblıkasynan tys jerlerge kóship ketkenderdi, Qazaqstan Respýblıkasynyń azamattyǵynan bas tartqandardy tirkeýden avtomatty túrde shyǵarý jumysy júrgizilip jatyr.

Búgingi kúni turǵyn úı ıesi HQO jáne «elektrondy úkimet» veb-portaly arqyly, sondaı-aq «elektrondy úkimet» portalynyń mobıldi azamattar bazasynda úı ıesiniń mobıldi telefon nomeri tirkelgen bolsa, sol jerde bir rettik paroldiń kómegimen óz úıinde turmaıtyn adamdardy tirkeýden shyǵara alady.