Ýtılalymdy engizý kólik baǵasynyń ósýine edáýir áser etti – depýtat

<p>ASTANA. KAZINFORM &ndash; Búgin Senattyń jalpy otyrysynda depýtat Sultanbek Mákejanov kólik alýǵa paıyzy tómen nesıe berý jáne jalpy avtoóndiris salasyndaǵy problemalardy jarııa etti.</p>

«Ekinshi deńgeıdegi bankter usynǵan jeńildikpen avtokólik alýǵa nesıe bólý kólemi halyqtyń suranysyn qanaǵattandyra almady. Ony autonesie.kz platformasynda 18 sekýnd ishinde aıaqtalǵan lımıt mólsheri anyq kórsetip tur», - dedi S. Mákejenov Úkimet basshysy Álıhan Smaıylovtyń atyna joldaǵan saýalynda. 

Onyń aıtýynsha, 2015 jyldan bastap memleket avtokólik alýǵa jeńildetilgen nesıe berý arqyly otandyq avtokólik óndirýshini qoldaýdyń naryqtyq tetigin qoldanyp keledi.

«Bizdiń memleket otandyq avtokólik óndirýshini qoldaı otyryp, elimizde shyǵarylatyn ónimniń qazaqstandyq quramdas bóligi arta túsetinine senim artty. Alaıda memleket qarjylandyratyn jeńildetilgen nesıe otandyq avtomobıl óndirisin damytýǵa is júzinde áser etken joq dep aıtýǵa bolady», - dedi depýtat.

Sultanbek Mákejanov osyǵan baılanysty jeńildetilgen nesıe jáne jalpy avtomobıl óndirisi salasynyń taǵdyryna qatysty Úkimettiń atyna birqatar másele aıtty.

«Elimizdegi jeńildetilgen tártipte avtokólik alýǵa nesıe berý elimizde avtomobıl parkin jańartý men halyqty avtokólikpen qamtamasyz etýdi arttyrý maqsatyn eskergen. Memleket avtoparkti jańartý úshin syrttan ákelinetin avtokólikke bastapqy tirkeý engizdi. Bastapqy tirkeý quny ákelinetin avtomobıldiń shyǵarylǵan jylyna baılanysty. Ol boıynsha eski kólik ákelý tıimsiz bolýy kerek edi, alaıda is júzinde bul barlyq kóliktiń qymbattaýyna ákelip soqty. Ýtılalym engizý de kólik baǵasynyń ósýine edáýir áser etti», - dedi senator Mákejanov.