Ýtılalym tómendegennen keıin avtomobıl baǵasy túse me – sarapshy pikiri
«Kez kelgen memleket ishki naryǵyn qorǵaý, otandyq óndirisin qoldaý úshin is-sharalar qabyldaıdy. Kádege jaratý alymy qazaqstandyq avtomobıl zaýyttarynyń qalyptasýy barysynda naqty rólge ıe boldy. Bul jol ónerkásipte, onyń ishinde avtomobıl jasaýǵa zor jetistikterge jetken birqatar eldiń tájirıbesi negizinde tańdap alynǵan bolatyn. Bastapqyda memleket salaǵa qajetti jaǵdaı men qoldaý is-sharalaryn jasap, jan-jaqty kómektesedi. Sodan keıin baryp atalǵan zaýyttar básekelestik ortada jumys isteýge qabiletti bola túsip, memleket qorǵaý is-sharalaryn birtindep tómendetedi. Ýtılalymdy 2 esege tómendetý kásiporyndarymyzdyń jumysyna áser etetindigi sózsiz. Eń aldymen naryqtaǵy básekelestik kúsheıedi. Buǵan qosa, otandyq avtozaýyttar jınaqtap úlgergen óndiris qarqynyń aıtarlyqtaı joǵary bolýy da kóńilge demeý. Ózderińiz-aq tóreligin aıtarsyzdar, osydan 3 jyl buryn Úkimet 5 jyldyń ishinde barlyq úlgidegi 100 myń avtomobıl qurastyrý mindetin júktegen edi. Al, otandyq avtoónerkásip 2021 jyldy 92 myń kólik qurastyrýmen aıaqtady. Demek, mejeli tsıfrǵa az ǵana qaldy. Munyń ózi karantındegi 2 jylǵa qaramastan qol jetkizilgen jetistik. Basqasha aıtar bolsaq, memlekettik qoldaý is-sharalary tıimdiligin berip otyr», - dedi ol.
Osy rette Qydyrolla Jumaǵulov «SemAZ» zaýytyn mysalǵa keltirdi.
«Múmkinshilikterdiń ashylǵanynan kórgennen keıin kásiporyn basshylyǵy óndiristi keńeıtý týraly sheshim qabyldady. Osy maqasatta qosymsha óndiris alańy satyp alyndy. Qoldanystaǵy 17 myń sharshy metrge qosymsha taǵy 30 myń sharshy metr aldyq. Bul alańda lokalızatsııany tereńdetýge múmkindik beretin zamanaýı qural-jabdyqtardy ornatý josparlanǵan. Qazaqstan Úkimeti atynan Indýstrııa jáne ınfraqúrylymdyq damý mınıstrligi jylda bizge qazaqstandyq qamtýdy tereńdetýge qatysty barynsha joǵary talap qoıyp keledi. Osy maqsatta zaýyt mınıstrlikpen ónerkásiptik qurastyrý týraly kelisim jasap, onda atalǵan sharttyń bári bekitilgen. Biz úshin lokalızatsııa tek qana qajettilik emes, sonymen birge tıimdilik ekendigin birneshe márte málimdedik. Bul eń aldymen ónimimizdiń ózindik qunyn tómendetedi», - dedi zaýyt dırektorynyń orynbasary.
Sonymen qatar ol kadr máselesine de jeke toqtalyp ótti.
«Qazirgi óndiristiń talabyna oraı jyl saıyn óńirimizdegi oqý oryndaryna talapty kúsheıtip kelemiz. Zaýytqa biliktiligi joǵary jumysshylardyń kelýi óte mańyzdy. Salamyzdy damytý mýltıplıkatıvti áser beredi. Zaýyttarymyzdy kezeń-kezeńmen damytýdyń arqasynda aralas ózge de salalar damı túsedi. Al bul jańa jumys orny, bıýdjetke salyq degen sóz», - dedi ol.
Zaýyt dırektorynyń orynbasary kádege jaratý alymy tómendegennen keıingi kólik baǵasyna qatysty oıymen de bólisti.
«Ýtılalym tómendegennen keıin avtomobıl baǵasy túse me?» dep jıi suraıdy. Menińshe, baǵa sál ǵana tómen túsýi múmkin. Óıtkeni, baǵanyń qalyptasýyna túrli faktor áser etedi jáne ýtılalym mólsheri bul rette negizgi emes. Biz ónimimizdiń qunyna kádege jaratý alymy qosylmaıtyndyǵyn aıtyp kelemiz. Avtoóndiristi yntalandyrý baǵdarlamasy ýtılalymdy óteýge múmkindik berdi. Al ımport arqyly elimizge keletin avtomobılder sál arzandaıtyn shyǵar. Qanshaǵa? Bul ımportaýshylarǵa qoıylatyn saýal», - dedi Qydyrolla Jumaǵulov.