Ýtılalym azyq-túlik qaýipsizdigine keri áserin tıgize me
«Keıbir qoǵam belsendileri ýtılalym azyq-túlik qaýipsizdigine de keri áserin tıgizip otyrǵandyǵyn aıtady. Bul da shyndyqqa janaspaıtyn uǵym dep oılaımyz. Qaıta aýyl sharýashylyǵy tehnıkalaryn shyǵaratyn zaýyttardyń otandyq bolýy azyq-túlik qaýipsizdigin qamtamasyz etýde. Sheteldik zaýyttar kelgennen keıin elimizdiń túpkir-túpkirinde qyzmet kórsetý ortalyqtaryn ashyp otyr. Eger buryn elimizde óndirisi bolmaǵan kezde tehnıkanyń qosalqy bólshegi qajet bolǵanda kútýge týra keletin. Óıtkeni, ol basqa elden keledi. Al qyzmet kórsetý ortalyqtary ashylǵannan keıin bul másele jeńildedi», - dedi vıtse-mınıstr Ortalyq kommýnıkatsııalar qyzmetindegi baspasóz máslıhatynda.
Osy rette Marat Qarabaev pandemııa kezinde 1 myń jedel járdem kóligine suranys týyndap, ony otandyq zaýyttar 2 aıdyń ishinde qurastyryp shyqqanyn mysalǵa keltirdi.
«Muny qalaı júzege asyra aldyq? Óıtkeni, elimizde óndirisi boldy. Pandemııa bastalǵan kezde elder bir-birine eshteńe shyǵarmady. Logıstıkalyq jumystar toqtap qaldy», - dedi ol.