Ústirtte fototuzaqqa ilingen qabylan Qazaqstannyń Qyzyl kitabyna engizildi
Bul týraly QR Ekologııa, geologııa jáne tabıǵı resýrstar mınıstrliginń Orman sharýashylyǵy jáne janýarlar álemi komıtetiniń baspasóz hatshysy Sáken Dildahmet Facebook paraqshasynda jazdy.
Onyń málimetinshe, fototuzaqqa qabylan 2019 jyldyń jeltoqsan aıy men 2020 jyldyń qańtarynda eki márte túsip qalǵan. Al jalpy Komıtet ókilderi Ústirtte qabylannyń paıda bolǵanyn 2018 jyly habarlaǵan bolatyn.
«Sol tusta qoryqta qabylandy zertteý boıynsha ekspedıtsııa uıymdastyrylǵan edi. Ekspedıtsııa qorytyndysy boıynsha, mamandar mysyq tuqymdastardyń sırek kezdesetin túri – aldyńǵy azııalyq qabylannyń paıda bolǵanyn rastaǵan edi. Osydan keıin komıtet jyrtqyshty zertteı bastady. Jaqynda sol qabylandy «Qazaqstan Respýblıkasynyń Qyzyl kitabyna engizý» jobasy boıynsha memlekettik ekologııalyq saraptamanyń oń qorytyndysyn aldyq», - dep jazady Sáken Dildahmet.
Qabylandy Qyzyl kitapqa engizýdegi basty maqsat – Qazaqstanda atalǵan ańdy saqtaý jáne oǵan monıtorıng jasaý boıynsha jumysty jalǵastyrý bolyp otyr.
Panthera pardus L.,1758 qabylany – jyrtqysh sútqorektilerdiń túri. Negizinen Afrıka men Ońtústik Azııada mekendeıdi.
Foto: www.facebook.com/s.dildakhmet