Ustazdyń biliktiligi men bilimi oqý ordasynyń deńgeıin aıqyndamaq – professor

TÚRKІSTAN. QazAqparat – Prezıdent Qasym-Jomart Toqaev Joldaýynda bilim berý sapasyn jaqsartýǵa qatysty máselege aıryqsha toqtaldy. Ońtústik Qazaqstan memlekettik pedagogıkalyq ýnıversıtetiniń rektory midetin atqarýshy Barshagúl Isabek osylaı málim etti, dep habarlaıdy QazAqparat tilshisi.

Onyń aıtýynsha bilim salasyndaǵy kúrdelengen máseleniń biri – qala men aýyl mektepteri arasyndaǵy orta bilim sapasynyń alshaqtap ketkenin alǵa tartady.

«Muǵalim – mekteptiń júregi» deıtin bolsaq, ustazdyń biliktiligi men bilimi oqý ordasynyń deńgeıin aıqyndamaq. Shalǵaıda ornalasqan aýyl mektepterindegi kadr tapshylyǵy, ondaǵy jaǵdaıdyń kóńil kónshitpeıtini bul máseleniń qordalanýyna alyp kelip otyr. Osyǵan oraı el Prezıdenti «Dıplommen – aýylǵa» baǵdarlamasynyń aıasyn keńeıtip, jumysty jańa deńgeıde jalǵastyrýdy tapsyrdy. Úkimetke kelesi jyldan bastap osy baǵdarlamany qarjylandyrýdy 20 mlrd teńgege jetkizýdi mindettegeni pedagogtardy qýantty. Jas mamandarǵa jasalǵan jaǵdaı – el bolashaǵyna quıylǵan ınvestıtsııa dep bilemin», - deıdi Barshagúl Isabek.

Sondaı-aq, ýnıversıtet basshysy Prezıdenttiń daryndy aýyl jastaryna da erekshe kóńil bólý qajettigin eskertkeni kóńil qýantatynyn aıtady. Onyń sózinshe jastardy ishinara iriktep, otandyq jáne sheteldik joǵary oqý oryndaryna daıyndaý kerek.

«Memleket basshysy az qamtylǵan jáne kóp balaly otbasylardy qoldaý úshin Úkimetke daryndy balanyń qabiletin damytýdyń jol kartasyn ázirleýdi tapsyrýy talaı qaragózderge jarqyn bolashaq syılary sózsiz. Keler kúnderde el tutqasyn ustar sol mektep partasynda otyrǵan jas óskinder ekenin eskersek, bul bastamalardyń barlyǵy baıandy bolashaq úshin jasalyp otyrǵan ıgilikti is bolmaq», - deıdi rektordyń mindetin atqarýshy, professor.