Ustaz – uly esim: Óskemendikter muǵalimderge alǵystaryn jetkizdi
Altyngúl Baıtemirovanyń eki uly bar. Olar Menovnoe orta mektebiniń 6 jáne 7 synyptarynda oqıdy. Parasat pen Jiger esimdi balalarynyń sabaq úlgerimi jaqsy, oqýǵa degen qulshynystary zor. Altyngúldiń aıtýynsha, bul – muǵalimderiniń eren eńbekteriniń arqasy.
«Minekeı, shýaqty kóktemniń alǵashqy merekesi – Alǵys aıtý kúni de kelip jetti. Osy rette, mektebimizdiń ustazdar qaýymyn shyn júrekten quttyqtaǵym keledi. Erekshe alǵysymdy synyp jetekshilerimiz Gúlzat Qamzınqyzy men Saltanat Oralhanqyzyna jetkizemin. Sondaı-aq bastaýysh synyptarda balalarymyzdyń sanasyna bilim dánin sápken Álııa Nursaıynqyzyna rızashylyǵymyz sheksiz. Sanaly urpaq tárbıelep, eńbekterińizdiń jemisin kóre berińizder!», - dedi ol.
Óskemen qalasynyń turǵyny óz sózinde pedagogtardyń bala tárbıesindegi róliniń qanshalyqty mańyzdy ekendigin jetkizdi.
«Ustazdyq etken jalyqpas, úıretýden balaǵa» dep hakim Abaı aıtqandaı, muǵalimderdiń el bolashaǵyn tý etken balalardy oqytyp qana qoımaı, úlgi-ónege, tálim-tárbıe berýi – ólsheýsiz, baǵasyz. Balapandarymyzǵa ekinshi ana bola bilgen sizderge basymdy ıemin. Qyzyǵy men shyjyǵy qatar júretin ustazdyq joldaryńyz árdaıym ashyq bolsyn», - dedi Altyngúl Baıtemirova.
Osy bilim ordasynda 6-synypta oqıtyn Jánibek Álıdiń anasy da muǵalimderge óz alǵysyn jetkizdi. Onyń ishinde orys tilinen sabaq beretin Saltanat Oralhanqyzynyń baýyr eti balasynyń sabaqqa degen qyzyǵýshylyǵyn oıatqanyn aıtty.
«Alash ardaqtysy Ahmet Baıtursynuly «Mekteptiń jany – muǵalim» dep beker aıtpaǵan. Oqýshylarǵa bilim berip, kórgen-bilgenderin úıretip, árdaıym qoldaý kórsetetin jan – ustaz. Sizderge alǵystan basqa aıtarymyz joq. Otbasylaryńyzǵa bereke, jumystaryńyzǵa tabys tileımin!», - dedi Lázzat Qaıdarova.