Úsikten qorǵanýdyń joldary qandaı - sanıtar dárigerler túsindirdi

PETROPAVL. QazAqparat – Soltústik Qazaqstan oblysynda sanıtar dárigerler úsik alýdan qorǵaný jáne onyń saldaryn joıý joldaryn aıtty, dep habarlaıdy QazAqparat tilshisi.

Qys qaharyna minip, aýa temperatýrasy 40 gradýsqa deıin jetetin kúnder alys emes. Osyǵan oraı SQO sanıtarııalyq-epıdemıologııalyq baqylaý departamentiniń mamandary kóshede úsip qalmaýǵa kómektesetin qarapaıym erejelerdi eske saldy.

«Negizinen egde jastaǵy jáne jas balalar tez úsik alady. Óıtkeni, olardyń terisi názik. Jasyna baılanysty balalar qatty tońǵanyn túsinbeıdi jáne bul týraly eresekterge aıta almaıdy. Sonymen birge ımmýnıteti álsiregen jáne aýrýdan keıingi adamdar da úsik alýǵa beıim keledi. Úsikten zardap shegetinderdiń qatarynda mas adamdar kóp. Olar betin, aıaq-qoldaryn jıi úsikke shaldyrady, sebebi spırttik ishimdik ishýden syrtqy faktorlarǵa keshiktirilgen reaktsııasy bolady», - deıdi mamandar.

Úsik shalǵan kezde teri shanshyp, qan uıdy, aıaq-qoldy qımyldatý qıyndaıdy. Kóbinese zaqymdalǵan jer qyzara bastaıdy.

Úıge oralǵanda, sanıtarııalyq dárigerler sýdyń temperatýrasyn birtindep kóterý arqyly úsik shalǵan qol nemese tabandy jyly sýǵa salýǵa keńes beredi, biraq birden ystyq sýǵa salýǵa bolmaıdy.

Eger qol astynda sý jáne jyly bólmege kirý múmkindigi bolmasa, onda tońǵan qoldy qoltyqqa tyǵyp jylytýǵa bolady.

«Eger teri qataıyp, kúldireýik paıda bolyp aǵara bastasa, mundaı jaǵdaılarda dereý medıtsınalyq kómekke júgingen jón. Deneniń tońǵan jerin qarmen ýqalaýǵa bolmaıdy. Bul úsigen jerdi odan saıyn álsiretedi.

Úsik shalǵan qoldy ashyq otta nemese elektr quraldarynyń kómegimen jylytýdyń qajeti joq. Óıtkeni, úsik shalǵan kezde teriniń sezimtaldyǵy nasharlaıdy jáne jylynýdyń ornyna kúıik alý qaýpi bar.

Eger adamnyń dene temperatýrasy tómendeı bastasa, uıqy bassa, tili kúrmelse, sýyqtan dirildeı bastasa onda ony tez arada jyly bólmege jetkizip, kıimmen jylytý kerek. Biraq mundaı jaǵdaıda vanna qabyldaýǵa, sondaı-aq adamdy alkogolmen esin jıdyrtýǵa bolmaıdy», - deıdi sanıtar dárigerler.

Mamandar sonymen qatar úsikke jetkizbeý úshin qysta jyly kıiný kerektigin eske salady. Qysta kóbinese polıester materıaldan jasalǵan kıimderdi kıgen durys. Júnnen toqylǵan kıim jylýdy saqtaýǵa kómektesedi.