Úsik saqtalady: 2-4 mamyrǵa aýa raıy boljamy

ASTANA.QazAqparat - «Qazgıdromet» RMK Qazaqstan boıynsha 2-4 mamyr kúnderi qalyptasatyn kún raıyna boljamyn jarııalady, dep habarlaıdy QazAqparat.

«Aýqymdy soltústik antıtsıklon eldiń soltústik, ortalyq jáne ońtústik aımaqtaryndaǵy aýa raıyn anyqtaıdy. Bul óńirlerde jaýyn-shashyn bolmaıdy, túngi ýaqytta úsik saqtalady.

Respýblıkanyń shyǵys, ońtústik-shyǵys jáne batys óńirlerinde atmosferalyq frontaldy bólikterdiń ótýine baılanysty kún raıynyń qubylmaly sıpaty kútiledi – batysta jańbyr jaýady, keı ýaqytta naızaǵaı oınap, burshaq túsedi, shyǵysta nóser jańbyr jaýady, ońtústik-shyǵystyń taýly aımaqtarynda keıde qatty jaýyn-shashyn bolady (jańbyr, qar).

Respýblıka boıynsha jeldiń kúsheıýi, tuman, ońtústik óńirlerde shańdy daýyl kútiledi», - delingen sınoptıkterdiń boljamynda.