Ýshyǵatyndaı másele joq - mınıstrlik armıan kólikterin tirkeýge qatysty

ASTANA. QazAqparat - Elimizde Armenııadan ákelingen kólikterdi tirkeý jáne olardy atalǵan elden shyǵarý máselesi qalaı sheshilip jatyr. Tolyǵyraq Іshki ister mınıstrligi Ákimshilik polıtsııa komıteti tóraǵasynyń mindetin atqarýshy Qaısar Sultanbaev aıtyp berdi, dep habarlaıdy QazAqparat tilshisi.

«Elge ákelingen armıan kólikterine qatysty birqatar suraq týyndap jatyr. Sońǵy 2-3 jyl ishinde atalǵan eldiń biraz kóligi ýaqytsha tirkeldi. Armıan avtokólikterin zańdastyrý qaralyp, másele tolyǵymen sheshiledi. Armenııanyń Іshki ister mınıstrligimen kólikterdi tirkeýden shyǵarý boıynsha birlesken is-shara ótkizilýde. Syrttan bólshektenip jetkizilip, elde qurastyrylǵan kólikterge qatysty másele de qarastyrylyp jatyr. Bastysy kólik ıesi tıisti qujattardy ótkizse bolǵany. Ýshyǵatyndaı másele joq», - dedi Qaısar Sultanbaev mınıstrlikte ótken baspasóz máslıhatynda.

Buǵan deıin QR ІІM men Syrtqy ister mınıstrligi sary nómirli kólikterdi Armenııa tirkeýinen qashyqtan shyǵarýdyń joldaryn qarastyryp jatqany aıtylǵan edi.

Aıta ketsek, búgin Іshki ister mınıstrliginde sheteldik kólikterdi elimizde zańdastyrý máselesine arnalǵan brıfıng ótti. Onyń barysynda syrttan ákelingen kólikterdi zańdastyrý úshin qandaı qujattar kerektigi aıtyldy.

Sondaı-aq sheteldik kólikti zańdastyrý qansha turatyny belgili boldy.

Odan bólek mınıstrlikten sheteldik kólikter Interpol jáne TMD elderiniń bazasy arqyly tekseriletini habarlandy.