Ushaqty tórt saǵattan artyq kútken jolaýshylarǵa ystyq tamaq berilýi tıis – Azamattyq avıatsııa komıteti

NUR-SULTAN. QazAqparat - QR Indýstrııa jáne ınfraqurylymdyq damý mınıstrligi Zoom jelisinde «Ashyq saǵat alańy» sharasyn uıymdastyryp, áýe tasymaly, turaqty halyqaralyq jańa áýe reısterin ashý men osy oraıda týyndaǵan túrli máseleler talqylandy, dep habarlaıdy QazAqparat mınıstrliktiń baspasóz qyzmetine silteme jasap.

Shara barysynda qalyń kópshilikti tolǵandyrǵan máselelerdiń biri áýe reısteriniń keshigýi jáne áýe kompanııalarynyń jolaýshylar aldyndaǵy jaýapkershilik máselesi boldy.

Bul saýalǵa basqosýda Azamattyq avıatsııa komıteti tóraǵasynyń orynbasary Saltanat Tompıeva jaýap berdi.

Ol reısterdi keshiktirgen avıakompanııalar kóp jaǵdaıda jolaýshylarǵa mindetti qyzmetterdi tıisti deńgeıde oryndamaıtynyn alǵa tartty. Sáıkesinshe olarǵa zańnamaǵa sáıkes shara qoldanylady.

«Árıne, ushýdyń keshigýi nemese aýystyrylýy kóptegen qolaısyzdyqtar týdyrady. Alaıda tehnıkalyq aqaýlar kez kelgen kezde bolýy múmkin. Tasymaldaýshylar jolaýshylardy reıstiń ushýyn eki saǵattan artyq kútý kezinde alkogolsiz sýsyndarmen qamtamasyz etýge mindetti. Al reıstiń ushýyn tórt saǵattan artyq kútken kezde ystyq tamaq berilýi tıis», – dedi Saltanat Tompıeva.

Sondaı-aq ol reısti kúndiz alty saǵat, túnde segiz saǵat kútken kezde jolýshylarǵa tasymaldaýshy usynǵan qonaqúıde turýǵa jáne tasymaldaýshy usynǵan kólikpen áýejaıdan qonaqúıge jáne keri qaıtý qyzmetteri kórsetilýi qajet.

Tasymaldaýshynyń kinásinen reıs keıinge qaldyrylǵan nemese 10 saǵattan astam merzimge kidirtilgen jaǵdaıda, jolaýshynyń qalaýy boıynsha áýe kompanııasy atalǵan qyzmetterdiń barlyǵyn kórsete otyryp, jolaýshyny bılette kórsetilgen mejeli pýnktke deıin jaqyn arada ushatyn reıspen tasymaldaýdy qamtamasyz etýge mindetti.

«Bul qyzmetterdiń barlyǵy jolaýshylarǵa qoldanystaǵy zańnamaǵa sáıkes tegin kórsetiledi. Eger de tasymaldaýshy kompanııa óz mindetin oryndamaǵan jaǵdaıda jolaýshylar Azamattyq avıatsııa komıtetine shaǵymdana alady. Biz kelip túsken shaǵymdardy zerdelep, tıisti sheshim qabyldaıtyn bolamyz, – dep atap ótti Azamattyq avıatsııa komıteti tóraǵasynyń orynbasary.