Ushaqtar jyl basynan beri 46 ret qusqa soǵylǵan: Mamandar máseleniń sheshý joldaryn qarastyrýda

NUR-SULTAN. QazAqparat - Sońǵy ýaqytta áýe kemeleriniń qustarmen soqtyǵysý jaǵdaılary jıilep ketti. Saldarynan avıakompanııalar reısterdiń keshiktirilýine jáne áýe kemelerin jóndeýge baılanysty qomaqty shyǵynǵa ushyraýda.

Osy máselege baılanysty QR Indýstrııa jáne ınfraqurylymdyq damý mınıstrliginiń Azamattyq avıatsııa komıteti jergilikti atqarýshy organdarmen birlesip jedel keńes ótkizdi, dep habarlaıdy QazAqparat komıtettiń baspasóz qyzmetine silteme jasap.

Baspasóz qyzmetiniń málimetterine qaraǵanda, QR áýe keńistigin paıdalaný jáne avıatsııa qyzmeti týraly» Zańyna sáıkes ushýdy ornıtologııalyq qamtamasyz etý Qazaqstannyń avıatsııalyq ákimshiligine júktelgen. Sonymen qatar QAÁ ushý qaýipsizdigin qamtamasyz etý boıynsha baqylaý men qadaǵalaýǵa da jaýapty.

Qazaqstannyń avıatsııa ákimshiliginiń aqparatyna súıener bolsaq, bıyl elimizdiń birqatar áýejaıynyń jaýapkershilik aımaǵynda ushaqtardyń qustarmen soqtyǵysýynyń 46 jaǵdaıy tirkeldi. Oqys oqıǵalar ásirese Almaty áýejaıynda jıi baıqalyp otyr.

Sarapshylardyń aıtýynsha, qustarmen soqtyǵysý maýsymdyq sıpatqa ıe. Qaqtyǵystardyń basym bóligi qustardyń kóktem jáne kúzdegi kóshi-qon kezinde jáne jyldyń jyly maýsymdarynda kóptep oryn alady. Jyl saıyn osy taqilettes oqıǵalar shilde nemese tamyz aılarynda jıi bolady.

Mamandardyń paıymdaýynsha, qustardyń soqtyǵysýyn tolyǵymen joıý múmkin emes. Alaıda bul qaýipti edáýir azaıtýǵa múmkindik bar. Qazaqstannyń azamattyq ákimshiligi sertıfıkattyq jáne ınspektsııalyq tekserýler júrgizý barysynda áýejaılardy paıdalanýshylardyń ulttyq zańnama talaptaryn saqtaýyn tekseredi. Onyń ishinde áýejaıdaǵy ushý-qoný jolaǵy aýdanynda patrýldeıdi, pırotehnıkalyq quraldardy, gaz attyn jáne bıoakýstıkalyq qurylǵylardy, lazerlerdi jáne ózge de quraldardy qoldana otyryp qustardy úrkitedi. Sondaı-aq qustardyń ushýy týraly aqparatty dıspetcherler jetkizýi etýi tıis.

Keńes qorytyndysy boıynsha jergilikti atqarýshy organ ókilderi jıynda kóterilgen máselelerdi ońtaıly ári jedel sheshýge yqpal etetindigin jetkizip, bul oraıda áýejaı ákimshiligimen birlesip jumys isteýge daıar ekendikterin bildirdi.

«Bul turǵyda tıisti is-sharalar qolǵa alynyp, sáıkes jumystar júrgizilýde. Osy rette áýejaı aımaǵyndaǵy zańsyz nysandardy joıýǵa bıýdjetten tıisti qarjynyń bólinbeýi qolbaılaý bolyp otyr», – deıdi Almaty qalasy ákimdiginiń ókili.

Jıyn qorytyndysy boıynsha qustardyń kóptep shoǵyrlanýyna áser etetin zańsyz nysandardy joıýdy jedeldetip, osy maqsattaǵy qarjylandyrý kólemin arttyrý usynyldy.

Bul másele búginde vedomstvonyń erekshe baqylaýynda.