Ushaqtan eki jazba qurylǵysy tabyldy — vıtse-mınıstr oqıǵa aıqyndala túsetinin aıtty

<p>ASTANA. KAZINFORM — Aqtaý mańynda apatqa ushyraǵan AZAL kompanııasynyń ushaǵynda eki saǵattyq jady bar ózdiginen jazatyn qurylǵy ornatylǵan.</p>

Bul týraly QR Kólik vıtse-mınıstri Talǵat Lastaev Kazinform agenttiginiń BIZDIÑ ORTA podkastyndaǵy eksklıýzıvti suhbatynda aıtty.

— Ádette, bul eki jazba qurylǵysy áýe kemesiniń artqy bóliginde ornalasady. Atalǵan ushaqtan (Embraer E190 — red.) ekeýi de tabyldy jáne qazirgi ýaqytta olardy oqý úshin tasymaldap jatyr. Naqty áýe kemesinde ekıpaj ben ushaqtyń eki saǵattyq qyzmetin jazatyn jazba qurylǵysy ornatylǵan. Tergeýshilerge oqıǵanyń barlyq derlik beınesi aıqyn kórinedi, — dedi vıtse-mınıstr.

Sondaı-aq, podkast qonaǵy «qara jáshikterdiń» eki túrge bólinetinin aıtýda.

— Birinshisi — CVR dep atalatyn dybystyq ózdiginen jazatyn qurylǵy. Ol ushaqta bolǵan barlyq oqıǵalardy, ekıpaj músheleriniń arasyndaǵy habarlamalar men aýdıodıalogtaryn jazady. Ushý bastalǵan sátten-aq bul qurylǵy avtomatty túrde ekıpajdyń qandaı sózderdi aıtqany, qalaı jaýap qatqany sekildi barlyq parametrlerdi jazady. Ekinshisi — FDR atty tehnıkalyq jazba qurylǵysy. Ol ushaqtyń tehnıkalyq parametrlerin — qozǵaltqyshtyń aınalý jyldamdyǵy, maı qysymy, gıdravlıkalyq qysym, djoıstıktiń nemese rýldiń ornalasý buryshy, aeronavıgatsııalyq málimetter jáne basqa da derekterdi jazyp otyrady, — dep túsindirdi T. Lastaev.

Eksklıýzıvti suhbattyń tolyq nusqasy Kazinform agenttiginiń Youtube-arnasynda jáne Jibek Joly telearnasynyń efırinde jarııalanady.