Ushaqta temeki shekken eki áıelge aıyppul salyndy

ALMATY. QazAqparat- «Air Astana» ushaǵynyń bortynda temeki shekken eki almatylyqqa aıyppul salyndy, dep habarlaıdy QazAqparat tilshisi.

Phýket – Almaty baǵytyndaǵy áýe reısi ushyp kelgennen keıin Almaty qalasy áýejaıyndaǵy jelilik polıtsııa bóliminiń qyzmetkerlerine akt boıynsha eki jolaýshy áıel berildi.

Tekserý barysynda kólik polıtseıleri ushaq bortynda elektrondy temeki shekken Almaty qalasynyń 36 jáne 37 jastaǵy eki turǵynyn anyqtady.

Tártip saqshylary quqyq buzýshylarǵa qatysty QR ÁQBtK-niń 441-babynyń 1-2-bóligi (Áýe kemesiniń bortynda temeki buıymdaryn, tutynýdyń elektrondyq júıelerin tutyný) boıynsha ákimshilik hattama toltyrylyp, árqaısysyna 50 aılyq eseptik kórsetkish mólsherinde aıyppul túrindegi ákimshilik jaza qoldanyldy.

Vedomstvo málimetinshe, jyl basynan beri elimizdiń kólik polıtseıleri túrli ákimshilik quqyq buzýshylyq jasaǵany úshin áýe reısinen 60 azamatty túsirdi, onyń ishinde 29 adam temeki ónimderin tutynǵan.