Ushaq apatynan japa shekken jaqynyna barmaq bolǵandarǵa halyq ushaqtaǵy ornyn berip jatyr

NUR-SULTAN. QazAqparat – Nur-Sultan áýejaıynda jolaýshylar Air Astana ushaǵyndaǵy oryndaryn áýe kemesi apatynan zardap shekkenderdiń týystaryna berdi. Bul týraly Air Astana áýe kompanııasynyń kiristerdi basqarý jónindegi dırektory Erbolat Baısalyqov aıtty, dep habarlaıdy QazAqparat tilshisi.

«Biz osy táýliktiń ishinde zardap shekkender men qaza tapqandardyń jaqyn týystary bolyp keletin 33 jolaýshyny jetkizdik. 19 adamdy búgin tańerteńgi 05:00-de alyp kettik. Búgin 11 balanyń anasyn jiberdik. Onyń bir balasy áýe apatynan zardap shekti, 10 balasymen ushyp ketti. ıAǵnı, bizde adamdardyń sany boıynsha shekteý joq. Barlyq jaqyn týystary usha alady. Sonymen qatar Nur-Sultan áýejaıynyń dárigerine de birge ushýdy ótindik», - dedi ol.

Onyń aıtýynsha, áýejaıda ushaq apatynan zardap shekkenderge óz oryndaryn bergen jolaýshylar da boldy.

«Qazirgi ýaqytta zardap shekkenderdiń nemese qaza tapqan adamdardyń týǵan-týystary úshin óte aýyr ekendigin túsinýimiz kerek. Sondyqtan osyndaı qadamǵa baryp, olardy tegin tasymaldadyq. Jańa jyl qarsańynda barlyq reıster tolyq. Sol sebepti Nur-Sultan áýejaıynyń tirkeý ornynan, halyq aldyna shyǵyp, jolaýshylardan zardap shekkenderdiń týystary úshin oryn berýdi ótindik. Baqytymyzǵa oraı, ondaı jolaýshylar tabyldy. Olarǵa zor rızashylyǵymyzdy bildiremiz», - dedi Erbolat Baısalyqov.