Ushaq apatynan qaza tapqandardyń otbasyna ótemaqy qashan aýdarylady

NUR-SULTAN. QazAqparat – QR Eńbek jáne halyqty áleýmettik qorǵaý mınıstri Birjan Nurymbetov Almaty túbinde áýe apatynan qaza tapqandarǵa ótemaqy qashan beriletinin aıtty, dep habarlaıdy QazAqparat tilshisi.

«Úkimet 4 mln teńgeden tólem jasaý týraly sheshim qabyldady. QR Eńbek jáne halyqty áleýmettik qorǵaý mınıstrligi tıisti qaýly jobasyn ázirlep, búgin oǵan daýys berdik. Bul qarajat qaza tapqandardyń otbasy músheleriniń jeke esepshotyna aýdarylady», - dedi mınıstr Úkimet otyrysynan keıin BAQ ókilderine bergen suhbatynda.

Sonymen qatar ol ushaq apatynan zardap shekkenderge ótemaqy tóleý máselesin jergilikti atqarýshy organdar sheshetinin aıtty.

«Eger zardap shekkenderge qatysty materıaldyq sıpatta qandaı da bir ótemaqy bolatyn bolsa, onda muny oqıǵa oryn alǵan jerdegi jergilikti bılik, ıaǵnı, Almaty qalasy men Almaty oblysynyń ákimdigi sheshedi. Úkimet deńgeıinde qaza tapqandardyń týystaryna ǵana 4 mln teńgeden ótemaqy tóleý týraly sheshim qabyldandy», - dedi ol.

Mınıstr ótemaqy qashan tólenetinin de aıtty.

«Ótemaqy tóleý merzimine qatysty aıtar bolsam, apat 27 kúni bolyp, 28 kúni ótemaqy tóleý týraly sheshim qabyldandy. Búgin Úkimet otyrysynda daýys berildi jáne búgin aqsha Eńbek mınıstrligine beriledi. Biz qysqa ýaqyttyń ishinde aqshany jeke esepshottarǵa aýdaramyz», - dedi Birjan Nurymbetov.