Ushaq apatynan qaza tapqan áskerılerdi jerleý rásimi ótti

ALMATY. QazAqparat - Búgin Almaty oblysynyń Boraldaı kentinde Ulttyq qaýipsizdik komıteti basshylyǵy qatysqan UQK Avıatsııa qyzmetiniń qaza tapqan áskerı qyzmetshilerine áskerı qurmet kórsetý rásimi ótti, dep habarlaıdy QazAqparat tilshisi QR UQK baspasóz qyzmetine silteme jasap.

«Qaza bolǵandardy jerleý ornyna jetkizý úshin Ulttyq qaýipsizdik komıtetiniń jerústi jáne áýe kólik quraldary tartyldy. UQK apat saldarynan qaza tapqan jáne zardap shekken áskerı qyzmetshilerdiń týystary men jaqyndaryna barlyq qajetti kómek pen qoldaý kórsetýde» , - delingen habarlamada.

Qyzmettik mindetterin oryndaý kezinde mert bolǵan áskerı qyzmetshiler eske alynyp, UQK Ortalyq apparatynyń ǵımaratynda vedomstvolyq tý tómen túsirildi, saǵat 17:22-de ulttyq qaýipsizdik organdarynda «Bir mınýt únsizdik» jarııalanady.

Qurylǵan vedomstvoaralyq jumys komıssııasy áýe apatynyń mán-jaıyn anyqtaý jáne borttaǵy ózdiginen jazatyn quraldy taldaý boıynsha jumys júrgizýde.

Eske sala keteıik, 13 naýryz kúni Nur-Sultan-Almaty baǵytynda kele jatqan AN-26 áskerı ushaǵy saǵat 17:22 kezinde radardan joǵalyp, qala áýejaıy mańynda apatqa ushyraǵan edi.

Ushaqta bolǵan 4 adam qaza tapty. 2 adam túrli jaraqatpen Almaty qalasynyń №4 qalalyq klınıkalyq aýrýhanasyna jetkizildi.

Keıinnen Almaty dárigerleri ushaq apatynan japa shekken eki adamnyń densaýlyǵy qalaı ekenin aıtty.

Ushaq apaty bolǵan jerge qala ákimi Baqytjan Saǵyntaev baryp, zardap shekkenderge barynsha kómek kórsetýdi tapsyrdy.

Sonymen qatar, Memleket basshysy áýe apatynyń sebepterin anyqtaýdy mindettedi.

Qazaqstan Respýblıkasy Ulttyq qaýipsizdik komıteti Almatyda apatqa ushyraǵan ushaqtyń qara jáshigindegi derekter tekserilip jatqandyǵyn málim etti.