Ushaq apatyna baılanysty bılet baǵasynyń kóterilgendigi týraly aqparat jalǵan – Berik Kamalıev

NUR-SULTAN. QazAqparat – Almaty túbinde «Bek Eır» ushaǵynyń apatqa ushyraýyna baılanysty bılet baǵasynyń kóterilgendigi týraly aqparat shyndyqqa janaspaıdy. Bul týraly búgin Ortalyq kommýnıkatsııalar qyzmetindegi baspasóz máslıhatynda QR Indýstrııa jáne ınfraqurylymdyq damý vıtse-mınıstri Berik Kamalıev aıtty, dep habarlaıdy QazAqparat tilshisi.

Onyń dereginshe, 2019 jylǵy 27-31 jeltoqsan kúnderi aralyǵyna josparlanǵan áýe kompanııasynyń 100-ge jýyq reısi oryndalmaıdy. Bul baǵyttarǵa barlyǵy 9157, onyń ishinde 8180 eresek, 765 bala, 212 náreste bıleti satylǵan.

«Qazirgi ýaqytta áýe kompanııasy 2019 jyldyń 31 jeltoqsanyna deıin josparlanǵan barlyq reısterdiń avıabıletteriniń tolyq qunyn qaıtarý jumystaryn júrgizip jatyr. 2020 jyldyń 3-10 qańtary aralyǵyndaǵy «Bek Eır» áýe kompanııasy reısteriniń jolaýshylar sany 9785 adamdy quraıdy. 1-2 qańtarǵa áýe kompanııasy ushýlardy josparlamaǵan. Oryndalmaıtyn reısterdiń jolaýshylaryna ózge áýe kompanııalarmen ushýdy usynamyz. Bul rette «Bek Eır» reısteriniń oryndalmaýyna baılanysty avıabıletterdiń baǵasy kóterilgen joq jáne kóterilmeıdi de. Tarıfterdiń kóterilgendigi týraly aqparat shyndyqqa janaspaıdy», - dedi Berik Kamalıev.

Sonymen qatar vıtse-mınıstr Jańa jyl meıramy qarsańynda jáne demalys kúnderi ádette avıabıletterdiń quny jaı kúnderge qaraǵanda joǵary bolatyndyǵyn aıtty.