Ushaq apaty: Jerlesteri ushqysh Marat Muratbaev jaıynda jyly lebiz bildirdi
Marat Muratbaev Tasbóget kentindegi №176 orta mektepti támamdaǵannan keıin Aqtóbe qalasyndaǵy joǵary ushqyshtar ýchılışesinde bilimin tolyqtyrdy. Eńbek jolyn 1982 jyly týǵan jerinde bastap, óz qyzmetinde mol tájirıbe jınaqtady. Áýede 20 myń shaqyrymnan astam qashyqtyqty baǵyndyrdy.
«Mol tájirıbesi arqasynda ushaq apatynda qanshama adamnyń ómirin saqtap qaldy. Ol qas-qaǵym sátte jyldam sheshim qabyldaı bildi. Ushaqtyń mundaı jaǵdaıda órtenip ketýi de múmkin edi. Óz ómirin qıǵanyna qaramastan Marat oǵan jol bergen joq. Ol aqkóńil, jarqyn júzdi jigit edi», - dedi áriptesi Rysbaı Sháripov.
Marat Muratbaev otbasynda tórt aǵaıyndynyń úlkeni bolatyn. Týystary onyń árdaıym kishige qamqorlyq, úlkenge izet kórsetetin jan bolǵanyn aıtady.
«Marat óziniń barlyq jetistigine mańdaı terimen jetti. Óz mamandyǵyn jaqsy kóre bildi. Óz kásibiniń qyr-syryn meńgerýge kóńil bólip júretin», - dedi apasy Kúlásh Aldabergenova.