Ushaq apaty: Prezıdent shuǵyl keńeste qandaı tapsyrma berdi

NUR-SULTAN. QazAqparat - QR Prezıdenti Qasym-Jomart Toqaev Almaty mańynda Bek Air áýe kompanııasynyń jolaýshylar ushaǵynyń apatqa ushyraýyna baılanysty shuǵyl keńes barysynda birqatar tapsyrma berdi, dep habarlaıdy QazAqparat tilshisi.

Keńeste 28 jeltoqsannyń jalpyulttyq aza tutý kúni retinde jarııalanýyna baılanysty Qasym-Jomart Toqaev búkil elimizde memlekettik týdy túsirý jáne oıyn-saýyq sharalaryn toqtatýdy tapsyrdy.

Memleket basshysy Úkimetke Almaty qalasy men Almaty oblysy ákimdikterimen birlesip qaza bolǵan azamattardyń otbasyna 4 mıllıon teńge kóleminde materıaldyq kómek kórsetýdi tapsyrdy. Munan bólek, qaıtys bolǵandardyń jaqyndaryna jan-jaqty psıhologııalyq jáne medıtsınalyq qoldaý kórsetiledi.

Keńes barysynda Memleket basshysy ushaq apatyna soqtyrǵan sebepterdi sapaly ári obektıvti túrde tekserýge; «Qazaqstannyń avıatsııalyq ákimshiligi» aktsıonerlik qoǵamyn bilikti mamandarmen qamtý jumystaryn tolyq aıaqtaý sharalaryn qabyldaýǵa; qaýipsizdik talaptaryna sáıkestendirý úshin barlyq áýe kompanııalarynyń jumystary men avıatsııalyq ınfraqurylym nysandaryn tekserýge tapsyrma berdi.

Bas prokýratýra men Іshki ister mınıstrligine qozǵalǵan qylmystyq is aıasynda ushaq apatyna ákelip soqtyrǵan sebepterdi anyqtaý, kinálilerdi zańǵa sáıkes jaýapkershilikke tartý, sondaı-aq, Almaty áýejaıynyń aýmaǵyna jaqyn ornalasqan jeke qurylystardyń zańdylyǵyn zertteý jóninde shara qabyldaýdy tapsyrdy.