Ushaq apaty kezindegi izdestirý men qutqarýdyń ulttyq jospary bekitildi

NUR-SULTAN. QazAqparat - «Qazaqstannyń avıatsııa ákimshiligi» AQ, QR IIDM azamattyq avıatsııa komıteti jáne tótenshe jaǵdaılar mınıstrligi mamandarynyń birlesken jumysynyń nátıjesinde izdestirý men qutqarýdyń ulttyq jospary ázirlenip bekitildi, dep habarlaıdy QazAqparat.

Bul jospar Qazaqstanda qoldanystaǵy ulttyq jáne halyqaralyq avıatsııalyq qoǵamdastyqqa ushýdy izdestirý-qutqarýmen qamtamasyz etý júıesin usyný maqsatynda ázirlengen.

Jospar Halyqaralyq azamattyq avıatsııa týraly konventsııaǵa «izdestirý jáne qutqarý» 12-qosymshasynyń, avıatsııalyq jáne teńiz izdestirý men qutqarý jónindegi nusqaýlyqtyń (IAMSAR Manuals, DOC 9731, 2019 jylǵy basylym), Eýropalyq izdestirý jáne qutqarý josparynyń (EUR Doc 039), tótenshe jaǵdaılardy izdestirý men qutqarý jáne joıý salasyndaǵy ulttyq zańnamanyń erejeleri negizinde ázirlendi.

Ulttyq jospar izdestirý-qutqarý qyzmetiniń jumysy qalaı qamtamasyz etiletinin, uıymdastyrylatynyn jáne qoldaý kórsetiletinin sıpattaıdy.

Árbir izdestirý jáne qutqarý aýdanyna ázirlengen izdestirý-qutqarý operatsııasyn uıymdastyrý jospary osyǵan qosymsha sanalady.

Ulttyq izdestirý jáne qutqarý josparynyń mátini «Qazaqstannyń avıatsııa ákimshiligi» AQ ınternet-resýrsynda jarııalanady.