Ushaq apatyna qatysty ártúrli alypqashpa áńgimelerdi taratýǵa bolmaıdy – Máýlen Áshimbaev

<p>ASTANA. KAZINFORM &ndash; Buqaralyq aqparat quraldarynda jáne áleýmettik jelide Aqtaý mańyńda Azerbaijan Airlines ushaǵynyń apatqa ushyrýy oqıǵasy boıynsha ártúrli alypqashpa áńgimelerdi taratýǵa bolmaıdy. Bul týraly Senat tóraǵasy Máýlen Áshimbaev málim etti.</p>

- Áýe kóliginiń apaty saldarynan úlken tragedııa boldy. Prezıdent Qasym-Jomart Toqaevtyń tapsyrmasymen arnaıy komıssııa qurylyp, jumysyn bastap ketti. Zardap shekken adamdarǵa tıis kómek berilip jatyr. Atap aıtsaq, bul oqıǵa boıynsha ártúrli alypqashpa áńgimelerdi taratýǵa bolmaıdy. Qazir negizsiz, atústi jasalǵan saraptaýlar aıasynda túrli qaýeset taratpaý kerek. Óıtkeni, apat bolǵan jerden túsirilgen vıdeolar men fotolar tarap jatyr ǵoı. Ony taratýdyń eshqandaı qajeti joq dep esepteımin, sebebi olarda qaıtys bolǵan adamdardyń deneleri jatqany kórinip tur. Sondyqtan bul turǵyda etıkalyq normalar bar, - dedi M.Áshimbaev Senattyń jalpy otyrysynan keıin tilshiler suraǵyna jaýap bere otyryp.

Onyń paıymynsha, bul oqıǵa boıynsha alypqashpa áńgimelerdiń taraýy halyqtyń arasynda shyndyqqa sáıkes kelmeıtin kózqarasty qalyptastyrýy múmkin.

- Sondyqtan sabyr saqtaýymyz kerek. Arnaıy komıssııa jumysyn bastady, Qazaqstan Úkimeti bul máselemen tyǵyz aınalysyp jatyr. Ázerbaıjan, Reseıdiń de tıisti memlekettik organdarynyń ókilderi anyqtaý jumystaryna qatysyp otyr. Memleketterdiń quzyretti organdary barlyq tıisti jumystar atqarylǵannan keıin, ózderiniń aqparatyn halyqqa jetkizedi. Atap aıtqanda, naqty aqparat jarııalanǵanǵa deıin túrli qaýeset taratý durys emes dep sanaımyn, - dedi Senat tóraǵasy.

Aıta keteıik, 25 jeltoqsanda Senat spıkeri Máýlen Áshimbaev Aqtaýdaǵy ushaq apatynan qaza tapqandardyń jaqyndaryna kóńil aıtty. 

Eske salsaq, Ázerbaıjan elordasy Bakýden Reseıdiń Groznyı qalasyna baǵyt alǵan Azerbaijan Airlines ushaǵy Qazaqstan aýmaǵynda apatqa ushyrady.

Aqtaýdaǵy ushaq apatynyń hronologııasy jarııalandy. 

Aqtaýdaǵy áýe apatynan mert bolǵan qazaqstandyqtar anyqtaldy. 

Keıinnen ushaq apatynan qaza tapqan qazaqstandyqtardyń otbasylaryna qarjylaı kómek kórsetiletini aıtyldy.

Memleket basshysy Qasym-Jomart Toqaev Ázerbaıjan Prezıdenti Ilham Álıevke kóńil aıtty.