Úsh jyldyq bıýdjet transfertteri týraly zań jobasyna Senat engizgen túzetýler maquldandy
13:12, 23 Qarasha 2022
ASTANA. QazAqparat – QR Parlamenti Májilisi 2023-2025 jyldarǵa arnalǵan bıýdjet transfertteri týraly zań jobasyna Senat engizgen túzetýlerdi maquldady, dep habarlaıdy QazAqparat tilshisi.
Qujatqa Senat depýtattary engizgen túzetýler týraly Májilistiń Qarjy jáne bıýdjet komıtetiniń múshesi Anatolıı Boıchın málimet berdi.
«Senat atalǵan qujatqa 3 túzetý engizdi. Onyń ishinde eki túzetý jalpy sıpattaǵy tranfertterdiń kólemimen baılanysty. Eńbek jáne halyqty áleýmettik qorǵaý mınıstrliginiń jalpy sıpattaǵy transfertteri maqsattyq tranfertke aýystyrylady. Taǵy bir túzetý oblystyq jáne aýdandyq mańyzdaǵy joldardy jóndeý jobalaryn qarjylandyrý tártibi ózgerýine baılanysy engizilip otyr», - dedi depýtat.
Májilis depýtattary Senat engizgen túzetýlerdi maquldaý týraly qaýly qabyldady.