Úsh jylda jalǵan habar taratqan 115 adam sottaldy – ІІM

ASTANA. QazAqparat – Jylyna jalǵan habarlama taratýdan keletin shyǵyn 500 myńnan 2 mln teńgege deıin eken. Bul týraly ІІM ekstremızmge qarsy is- qımyl departamenti 1 basqarmasy bastyǵynyń orynbasary Almas Talqanbaev málim etti, dep habarlaıdy QazAqparat tilshisi.

«Bizdiń esepteýimiz boıynsha jalǵan shaqyrtý boıynsha bir ret shyqqannyń ózinde 200 myń teńgeden 300 myń teńgege deıin qarajat jumsalady. Al iri saýda ortalyqtarynyń jumysy toqtap qalǵanda árbir saǵat saıyn mıllıondaǵan teńgeden aıyrylýy múmkin. Qylmystyq isterdi tergeý barysynda memlekettiń ózine keltirilgen materıaldyq zalaldyń ózi jyl saıyn 500 myńnan 2 mln teńgege deıin eken», - dedi Almas Talqanbaev mınıstrlikte ótken baspasóz máslıhatynda.

Sondaı-aq spıker adamdardyń atalǵan áreketke ne úshin baratyny týraly aıtty.

«Sońǵy 3 jylda jalǵan habar taratqan 115 adam sottaldy, onyń ishinde 15-i kámelet jasyna tolmaǵan. Mundaı áreketterge adamdar kóbine mas kúıinde, ázil úshin nemese eshteńe jasamaý nemese birjaqqa barmaý úshin barady. Keıbireýler kek alý úshin nemese bir uıymnyń qyzmetine zııan keltirý nemese mekteptegi oqý protsesin toqtatý úshin jasaıdy», - deıdi ol.