Úsh jylda tabıǵı monopolııalarǵa qansha qarjy tartylǵany belgili boldy
«Zań jobasy birqatar negizgi mindetterdi sheshýge baǵyttalǵan. Birinshiden, tabıǵı monopolııalar salasyndaǵy zańnamany júıelendirý. Ekinshiden, tabıǵı monopolııalar sýbektileri rettelip kórsetiletin qyzmetteriniń tıimdiligin, sapasy men senimdiligin arttyrý maqsatynda olardyń qyzmetin retteýdiń jańa yntalandyrý ádisin engizý. Úshinshiden, tabıǵı monopolııalar sýbektileriniń qyzmetiniń ashyqtyǵyn arttyrý jáne tarıftik smetalar men ınvestıtsııalyq baǵdarlamalardyń oryndalýyn baqylaýdy kúsheıtý», - dedi QR Ulttyq ekonomıka mınıstri Tımýr Súleımenov.
Aıta keteıik, qoldanystaǵy redaktsııadaǵy «Tabıǵı monopolııalar týraly» Zań 1998 jyly qabyldanǵan bolatyn. Jıyrma jyldyń ishinde Zańǵa 15 zańmen 200-den astam túzetýler engizildi. Osyǵan baılanysty Zań júıeliligin joǵaltty jáne siltemelerdiń edáýir sanynan turady, sondaı-aq qabyldaýǵa aýyr.
Odan bólek, búgingi kúni tabıǵı monopolııalar sýbektileriniń qyzmetin retteý, tarıfterdi qalyptastyrý jáne bekitý rásimderi 79 zańǵa táýeldi aktide bekitilgen. Zań jobasynda silteý normalaryn azaıtý jáne barlyq zańǵa táýeldi aktilerdi eki bazalyq qujatqa biriktirý kózdeledi.
2015 jyldan bastap tabıǵı monopolııalar salasyna, onyń ishinde turǵyn úı-kommýnaldyq sharýashylyǵyna ınvestıtsııalardy tartý boıynsha aýqymdy jumys júrgizilýde.
«Bul tabıǵı monopolııalar salasyna 2021 jylǵa deıin 2,2 trln teńge kóleminde ınvestıtsııalar, onyń ishinde shamamen 1,3 trln teńgeni turǵyn úı-kommýnaldyq sharýashylyǵy salasyna tartýǵa múmkindik berdi. Sońǵy 3 jylda 1,02 trln teńge somaǵa ınvestıtsııalar, sonyń arasynda turǵyn úı-kommýnaldyq sharýashylyǵyna 684 mlrd teńge tartyldy, olardyń 98 paıyzy tolyǵymen bıýdjetten tys kózder esebinen qarjylandyryldy. Odan basqa, jańa tarıftik saıasat sheńberinde halyqaralyq qarjy uıymdarynyń ınvestıtsııalary belsendi túrde tartylýda», - dedi T. Súleımenov.
Onyń sózine qaraǵanda, sońǵy 2 jylda halyqaralyq qarjy uıymdarynan 19,6 mlrd teńge tartyldy. Bul ınfraqurylymnyń tozý ósimin toqtatyp qana qoımaı, teris trendti ózgertýge múmkindik berdi.