Úsh jylda sıntetıkalyq esirtkige táýeldi jastardyń sany artty - depýtat

NUR-SULTAN. QazAqparat – Úsh jylda sıntetıkalyq esirtkige táýeldi jastardyń sany 2,5 esege ósti. Bul týraly Májilistiń jalpy otyrysynda depýtat Mádı Ahmetov mádim etti, dep habarlaıdy QazAqparat tilshisi.

«Jastarymyzdy azǵyryp, bolashaǵyn oıran etken sıntetıkalyq esirtki máselesi elimizde barynsha kúrdelenip keledi. Oǵan kúni keshe elordanyń qaq ortasynda sıntetıkalyq esirtki jasaıtyn iri zerthananyń jabylýy dálel. Osydan on shaqty jyl buryn «mef, krıstall, skorost, sol» degen túrli ataýmen naryqqa engen, sanany ýlaǵan sıntetıka jas urpaqtyń ómirin azapqa aınaldyrýda. Atalǵan máselege Memleket basshysy erekshe nazar aýdaryp, Úkimetke tıisti sharalardy qabyldaýdy tapsyrǵan bolatyn. Áıtse de, Іshki ister mınıstrliginiń aqparaty boıynsha, 2021 jyly sıntetıkalyq esirtki aınalymyna baılanysty 1036 qylmys tirkelip, 160 keliden astam psıhobelsendi zat, 3,5 tonna prekýrsor tárkilenip, 14 esirtki zerthanasy joıylǵanymen, sońǵy úsh jylda sıntetıkalyq esirtkige táýeldi jastardyń sany 2,5 esege ósken», - dedi M. Ahmetov Úkimet basshysynyń orynbasary Eraly Toǵjanovtyń atyna joldaǵan saýalynda.

Onyń aıtýynsha, jasóspirimder úshin sıntetıkalyq esirtki erkin saýdada, qoljetimdi jáne arzan. Oǵan tapsyrys berý árip tanyp, Telegram-nyń tilin bilgenge esh qıyndyq týdyrmaıdy. Qiwi-ámııan, krıptovalıýta onlaın tólemderi arqyly taýardy «baılanyssyz», bir-birimen kezdespeı saýdalaý jolǵa qoıylǵan.

«Sondaı-aq, sońǵy kezde «kýrer, zakladchık» retinde jasóspirimderdi jumysqa tartý jıileýde, olar ózderin zamanaýı tilmen «kladmen, mıner» dep ataıdy. Áleýmettik jelide tájirıbeni qajet etpeıtin, tıimdi jumys kestesin, joǵary jalaqyny, tipti «mansaptyq ósýdi» usynǵan habarlamalar kóp kezdesedi. Qazirgi qıyn jaǵdaıda tyǵyryqqa tirelgen jastardy aptasyna 150-200 myń teńgege deıin tabys tabý múmkindigi qyzyqtyrmaı qoımasy anyq. Nátıjesinde, «kladmender men mınerler» jaýapqa tartylyp, temir tordyń artynda otyr, al esirtki saýdalaýshylar kóleńkede qalyp, bostandyqta júr. Bul kesel ár otbasynyń qasiretine aınalýy múmkin, odan eshkim saqtalmaǵan. Nashaqorlyq baı-kedeıge, jas-kárige bólindeıdi. Sol sebepti tıisti usynystardy eskerip, shuǵyl arada shara qoldanýyńyzdy suraımyn», - dedi depýtat.

Osy oraıda myna uysynystar jasaldy:

-Jastar arasyndaǵy nashaqorlyq boıynsha zertteý júrgizip, esirtkige táýeldilerdiń sanyń anyqtaý qajet;

-Quziretti organdardaǵy mamandardyń biliktiligin arttyryp, arnaıy zamanaýı tehnıkamen jabdyqtaý kerek;

-Jasóspirimder arasyndaǵy júıeli profılaktıkalyq jumysty, vedomstvoaralyq baılanysty kúsheıtý mańyzdy.