Úsh jylda sıntetıkalyq esirtkige táýeldi jastar sany eki jarym esege artqan - depýtat

ASTANA. QazAqparat - Májilis depýtaty Ǵalymjan Eleýov palatanyń jalpy otyrysynda jastar arasyndaǵy esirtkige qumarlyq máselesin kóterdi, dep habarlaıdy QazAqparat.

Depýtattyń aıtýynsha, búginde jastardyń densaýlyǵyna, ál-aýqatyna jáne qaýipsizdigine zalal keltiretin ótkir problemalardyń biri – nashaqorlyq.

«Sońǵy úsh jylda sıntetıkalyq esirtkige táýeldi jastardyń sany eki jarym esege artqan. Sebebi, sıntetıkalyq esirtkiler jasóspirimder úshin arzan ári oǵan ońaı qol jetkizýge bolady», – dedi Ǵ. Eleýov.

Osy oraıda májilismen Іshki ister mınıstriniń birinshi orynbasary Marat Qojaevtan sıntetıkalyq jáne taǵy basqa esirtkilermen «baılanyssyz» saýda arnalaryn anyqtaý men olardyń jolyn kesý úshin qandaı sharalar qoldanyp jatqanyn surady. Sonymen qatar esirtki taratatyn adamdardy jazalaýdy qatańdatý jóninde mınıstrliktiń atqaryp jatqan is-áreketteri týraly saýal qoıdy.

M.Qojaev atap ótkendeı, 2019 jyldan beri esirtki tasymaldaýshylarǵa qatań jaza belgilengen. Olardy 5 jyldan ómir boıyna bas bostandyǵynan aıyrý qarastyrylǵan. Sondaı-aq, elimizde birneshe narkozerthana, prıtondar anyqtalyp, 105 kılogramnan astam sıntetıka tárkilengen. Onyń baǵasy 2 mlrd teńgeden asady.

Óz kezeginde, Aqparat jáne qoǵamdyq damý mınıstri Darhan Qydyráli osy baǵytta mınıstrlikte arnaıy jumys toby 2019 jyldan beri úzdiksiz jumys istep kele jatqanyn aıtty. Olar kúndiz-túni baqylaý qyzmetterin iske asyryp, ári qaraı Іshki ister mınıstrligine tapsyrady.