Úsh jylda qazaqstandyqtardyń zeınetaqysy 27 % ósedi

ALMATY. QazAqparat- Úsh jylda qazaqstandyqtardyń zeınetaqysy 27 % ósedi. Bul týraly Óńirlik kommýnıkatsııalar qyzmeti alańynda ótken baspasóz máslıhatynda Eńbek jáne áleýmettik qorǵaý komıtetiniń Almaty qalasy boıynsha departamenti basshysynyń áleýmettik máseleler jónindegi orynbasary Rızvangúl Daraeva aıtty, dep habarlaıdy QazAqparat tilshisi.

Spıkerdiń keltirgen málimetine sáıkes, qazir elimizde 2 mln astam zeınetker bar.

«Joldaý sharalarynyń biri 2023 jyldan bastap áıelderdiń zeınetkerlik jasyn 61 jas deńgeıinde 5 jylǵa josparlanǵan arttyrýdy toqtata turýmen baılanysty boldy. Bul sheshim koronavırýs pandemııasynyń azamattardyń densaýlyǵy men ómir súrý uzaqtyǵyna keri áserin tıgizgenin eskere otyryp qabyldandy. Aldaǵy 5 jyl ishinde densaýlyq saqtaý júıesin jaqsartý jóninde sharalar qabyldanatyn bolady. Bul rette aýyl medıtsınasyna, azamattardyń densaýlyǵyn qalpyna keltirýge jáne qoldaýǵa baǵyttalǵan ońaltý ortalyqtary jelisin qurýǵa jáne keńeıtýge erekshe nazar aýdarylady», - dedi Rızvangúl Daraeva.

Onyń aıtýynsha, 2023 jyldyń 1 qańtardan bastap 2027 jylǵa deıin eń tómengi bazalyq zeınetaqy mólsherin eń tómengi kúnkóris deńgeıiniń 54%-ynan 70%-yna deıin, eń joǵarǵysyn – tıisinshe 100 %-dan 120 %-ǵa deıin kezeń-kezeńimen jetkizý kózdelgen.

«Osy kezeńde bazalyq zeınetaqy mólsheri orta eseppen 51%-ǵa deıin artatyn bolady. Bul rette, bazalyq zeınetaqynyń ortasha mólsheriniń jyl saıynǵy ósýi shamamen 13%-dy qurap, barlyq 2 mln zeınetkerdi qamtıdy.Usynylyp otyrǵan sharalar 2025 jylǵa qaraı jıyntyq zeınetaqyny orta eseppen 27%-ǵa ósirýge (3 jyl ishinde – 109 myńnan 138 myń teńgege deıin) jáne jıyntyq zeınetaqydaǵy memlekettik tólemderdiń úles salmaǵyn arttyrýǵa múmkindik beredi. Osylaısha, memleket qart adamdar arasynda kedeıliktiń ósýine jol bermeıdi»,- dedi ol.

Sondaı-aq Rızvangúl Daraeva BJZQ-nyń jańa ınvestıtsııalyq strategııasy ázirlenetinin málám etti.

«Jınaqtaýshy zeınetaqy júıesiniń qarjylyq turaqtylyǵyn qamtamasyz etý jáne azamattardyń zeınetaqy jınaqtarynyń tabystylyǵyn arttyrý maqsatynda zeınetaqy aktıvterin tıimdi basqarýdy arttyrý boıynsha sharalar qabyldanatyn bolady. Bul rette BJZQ-nyń jańa ınvestıtsııalyq strategııasyn ázirleý jáne zeınetaqy aktıvterin basqarýǵa ınvestıtsııalaýda úlken tájirıbesi bar kásibı jáne ashyq jeke kompanııalardy tartý josparda», - deıdi spıker.

Búginde azamattardyń zeınetaqy aktıvteriniń búgingi kólemi 13 trln teńgeden asty. Byltyr BJZQ ınvestıtsııalyq portfeliniń tabysy 11,13%-dy qurady.