Úsh jylda Qaraǵandy oblysynyń ındýstrııasyna 1 trln teńge baǵyttalǵan

ASTANA. QazAqparat - Qaraǵandy oblysy ákimdiginde IIDMB júzege asyrylý barysyn talqylaǵan apparattyq jınalys ótti, dep habarlaıdy óńir ákimdiginiń resmı saıty.

Qaraǵandy oblysynda ındýstrıaldy-ınnovatsııalyq damytý memlekettik baǵdarlamasyn júzege asyrýdyń úsh jylynda AJÓ-degi (aımaqtyq jalpy ónim) ónerkásiptik óndiris deńgeıi 49,5% quraǵan. 2015-shy jylmen salystyrǵanda ósim 6,2% jetti. Aımaq AJÓ-degi óńdeýshi sektordyń úlesi boıynsha elimizde birinshi orynǵa ıe. 

- Qaıta óńdeý sektorynyń óndiris qarqyny 2017 jyly 2015 jylmen salystyrǵanda 1,7 esege ulǵaıǵan. Bul ósim IIDMB basym sektorlarynda óndiristiń ulǵaıýymen baılanysty: túrli-tústi jáne qara metallýrgııa, mashına qurylysy, hımııalyq ónerkásip óndirisi, azyq-túlik óndirisi, qurylys materıaldaryn óndirý. Óńdeý óndirisiniń kólemi 2017 jyly 1,8 trln teńgeni qurady, - dep málimdedi Ónerkásip jáne ındýstrıaldy-ınnovatsııalyq damý basqarmasy basshysynyń mindetin atqarýshy Qaırat Shormanbaev.

Óńdeý sektoryndaǵy eńbek ónimdiligi bir jumyskerge 32,7 myń dollarǵa deıin jetti, úsh jylda bul kórsetkish 30%-ǵa deıin ulǵaıǵan.

- Jalpy úsh jylda memlekettik baǵdarlamany júzege asyrý barysynda negizgi kapıtalǵa quıylǵan ınvestıtsııa 1 trln teńgeni qurady, onyń ishinde óńdeý sektory - 280 mlrd teńge. Kásipkerlerdi qoldaý kartasyna jalpy somasy 771 mlrd teńgeden asatyn 103 joba engizildi, ol óz kezeginde 11 myń jańa jumys ornynyń paıda bolýyna septigin tıgizedi, - dep atap ótti Qaırat Shormanbaev.

Úsh jylda oblysta ındýstrııalandyrý baǵdarlamasy boıynsha 84 jańa óndiris iske qosyldy. Ortasha eseptegende aı saıyn Kásipkerlerdi qoldaý kartasy boıynsha engizilgen kásiporyn 8 mlrd teńgege ónim shyǵarady.

- 2018 jyly jalpy somasy 42 mlrd teńgeni quraıtyn jáne 700-ge jýyq jańa jumys oryndaryn quratyn 4 iri jobany iske qosý josparlanyp otyr, - dep málimdedi Qaırat Shormanbaev.

Qaraǵandyda tsellıýlozdyq-qaǵaz kombınaty salynady. Shet aýdanynda katodtyq mys shyǵaratyn jańa zaýyt paıda bolady. 
Maker JShS oblys ortalyǵynda mashına qurylys óndirisin jańǵyrtady. Aqtoǵaı aýdanynda "Altynalmas" kompanııasy Pýstynnoe ken ornynda altyn shyǵaratyn fabrıkanyń ónimdiligin ulǵaıtpaq.

Oblys ákimi Erlan Qoshanov ónerkásiptegi ósim qarqynyn tómendetpeýdi, barlyq josparlanǵan kórsetkishterge qol jetkizýdi tapsyrdy.