Úsh jylda 126 mln teńge jymqyrǵan áskerı bólim basshylaryna úkim shyqty

NUR-SULTAN. QazAqparat – Pavlodar qalasyndaǵy shekara qyzmeti №2033 áskerı bóliminiń qarjy bóliminiń bastyǵy men áriptesteri 126,5 mln teńge jymqyrǵany úshin bas bostandyǵynan aıyryldy, dep habarlaıdy QazAqparat tilshisi.

QR Sybaılas jemqorlyqqa qarsy is-qımyl agenttiginiń asa mańyzdy ister jónindegi tergeýshisi Qaısar Barjaqsynov Antikor aqparat alańynda osylaı dep málim etti.

«2021 jylǵy 27 qyrkúıekte Semeı garnızony áskerı sotynyń úkimimen bıýdjet qarajatyn jymqyrǵany úshin Pavlodar qalasynda ornalasqan shekara qyzmetiniń 2033 áskerı bólimi qarjy bóliminiń bastyǵy, maıor Jýanyshbaev 10 jyl merzimge bas bostandyǵynan aıyryldy. Osy úkimmen qarjy bólimi bastyǵynyń aǵa kómekshisi, aǵa leıtenant Bıgeldınov 8 jylǵa bas bostandyǵynan aıyryldy. Sondaı-aq, qarjy bóliminiń býhgalteri Esentaeva 4 jylǵa sottaldy», - dedi agenttiktiń asa mańyzdy ister jónindegi tergeýshisi.

Onyń sózinshe, kúdiktiler úsh jyldyń ishinde áskerılerdiń turmys jáne issapar shyǵyndaryna dep bólingen 126,5 mln teńgeni jymqyrǵan.

«Atalǵan adamdar 2015-2018 jyldar aralyǵynda áskerı qyzmetshilerdi turmys shyǵyndary men issapar shyǵystaryn esepteý jáne olardy keıinnen berý arqyly jalpy somasy 126,5 mln teńge bıýdjet qarajatyn jymqyrdy dep aıyptalǵan. Jýanyshbaev pen Bıgeldınov ómir boıy memlekettik qyzmette qyzmet atqarý quqyǵynan, sondaı-aq áskerı ataqtarynan aıyryldy. Esentaeva 8 jyl merzimge materıaldyq jaýapkershilikke baılanysty qyzmetpen aınalysý quqyǵynan aıyryldy. Úkim zańdy kúshine engen joq», - dedi Qaısar Barjaqsynov.