Úsh jyl ishinde elimizde jan basyna shaqqandaǵy aqshalaı tabys 22 paıyzǵa artty

ASTANA. QazAqparat - Sońǵy úsh jyl ishinde elimizdegi jan basyna shaqqandaǵy aqshalaı tabys 22 paıyzǵa artty, jalaqy 21 paıyzǵa ósti. Búgin Memleket basshysy, «Nur Otan» partııasynyń Tóraǵasy Nursultan Nazarbaevtyń jetekshiligimen ótip jatqan «Nur Otan» partııasy Saıası keńesiniń keńeıtilgen otyrysynda birinshi vıtse-premer Baqytjan Saǵyntaev osylaı málimdedi.

Eske salaıyq, Saıası keńeste partııanyń saılaýaldy tuǵyrnamasyn júzege asyrýdyń 2,5 jyl ishindegi kezeńdik nátıjeleri talqylanýda. «Tuǵyrnamada kórsetilgenindeı, jumyspen qamtýdyń 2020 jylǵa deıingi Jol kartasy iske asýda. 2011 jyldyń shilde aıynan bastap, baǵdarlama boıynsha 400 myńnan astam adam jumyspen qamtamasyz etildi. Aýyldarda shaǵyn nesıe berý tetigi de belsendi júrgizilýde. Búgingi kúni 36 myń 500 aýyl turǵynyna shaǵyn nesıe berildi, onyń 25 myńnan astamy óz isin ashyp, qosymsha jumys oryndary quryldy», - dedi Baqytjan Saǵyntaev. Sonymen qatar Úkimet basshysynyń orynbasary saılaýaldy tuǵyrnamanyń mindetteri aıasynda «Halyqtyq ІRO» baǵdarlamasy da júzege asyp jatqanyn, sonyń ishinde «QazTransOıl» aktsııalary satylǵanyn, KEGOK aktsııalaryn ornalastyrý 5 qarashadan bastap qolǵa alynǵanyn jetkizdi. «Zeınetaqy júıesin damytýdy odan ári jalǵastyrýdyń 2030 jylǵa deıingi tujyrymdamasy qabyldandy. Jumys berýshiler óz qyzmetkerleriniń paıdasyna 5 paıyzdyq jarna aýdaratyn jańa shartty jınaqtaýshy júıe 2018 jyldyń 1 qańtarynan qoldanylatyn bolady. Al zeınetaqynyń ortasha mólsheri 1,3 esege ósti», - dedi B.Saǵyntaev.