Úsh júz adamnyń 260 mln teńgesin jymqyrǵan L-Capital kompanııasyna qatysty tergeý aıaqtaldy

NUR-SULTAN. QazAqparat – L-Capital kompanııasyna qatysty qylmystyq is tergelip bitti. Bul týraly QR ІІM tergeý departamentiniń basshysy Sanjar Ádilov málim etti, dep habarlaıdy QazAqparat tilshisi.

«Mınıstrliktiń jetekshilik etýimen arnaıy prokýrorlar qyzmeti Nur-Sultan, Shymkent qalasy jáne Atyraý oblysynda «L-Capital» (Iskanderov G. I Jantelesova T.) kompanııasyna qatysty qylmystyq isti qarady. Kompanııa salymshylardy baǵaly qaǵazdarǵa ınvestıtsııa quıýǵa shaqyrǵan», - dedi Sanjar Ádilov mınıstrlikte onlaın ótken baspasóz máslıhatynda.

Onyń aıtýynsha, atalǵan uıym qyzmetinen 300-den astam adam zardap shekken.

«Kelgen shyǵyn kólemi 260 mln teńgeden asyp tústi (32 myń AQSh dollary). Búginde qylmystyq is sońyna jetti. Qazir ýaqytta qatysy bar jandar ispen tanysyp jatyr», - deıdi ol.

Eske sala ketsek, byltyr Almaty polıtsııasy «L-Capital» kompanııasynan zardap shekken salymshylarǵa júgingen edi.

Buǵan deıin Qazaqstanda 30 myńnan astam adamnyń qarjy pıramıdalaryna aldanǵany aıtyldy.

Odan bólek, mınıstrlik qarjy pıramıdasyna aldanyp qalmaýdyń amalyn atady.