Úsh jylda 1300 km astam temirjol salýdy josparlap otyrmyz – Memleket basshysy

<p>Ortalyq Azııa aımaǵy búginde halyqaralyq kólik-tranzıt baǵyttaryn damytý jáne ártaraptandyrý isinde óte mańyzdy ról atqarady. Bul týraly Prezıdent Qasym-Jomart Toqaev BUU-nyń Ortalyq Azııa ekonomıkalaryna arnalǵan Arnaıy baǵdarlamasyna (SPEKA) qatysýshy memleketter basshylarynyń birinshi sammıtinde aıtty.&nbsp;<a href="https://kaz.inform.kz/" target="_blank" rel="noopener">Kazinform</a>&nbsp;bul týraly Aqordaǵa silteme jasap habarlaıdy.</p>

Memleket basshysynyń aıtýynsha, SPEKA elderi (BUU-nyń Ortalyq Azııa ekonomıkalaryna arnalǵan Arnaıy baǵdarlamasy) búginde shyn máninde, Eýropa men Azııa arasyndaǵy qurlyqaralyq kópirge aınaldy.

«Bul – orasan zor múmkindik. Ony damyta túsýimiz kerek. Bul rette halyqaralyq Transkaspıı kólik baǵytyn órkendetýge úlken úmit artamyz. Orta dálizdi «Bir beldeý, bir jol» jobasymen, sondaı-aq Transeýropalyq kólik jelisimen (TEN-T) jáne Global Gateway strategııasymen ushtastyrýdyń álemdik saýdaǵa mýltıplıkatıvti áseri zor bolatynyna senimdimin. Buǵan qosa, Qazaqstan «Soltústik – Ońtústik» dálizin damytý úshin belsendi yntymaqtastyqqa daıyn.

Sońǵy 15 jylda elimiz kólik ınfraqurylymyna 35 mıllıard dollardan astam ınvestıtsııa quıdy. Aldaǵy úsh jyl ishinde 1300 shaqyrymnan astam temirjol salýdy josparlap otyrmyz. Bul Qytaı, Ońtústik Azııa, Reseı jáne Eýropa baǵyttaryna júk ótkizý áleýetin arttyrýǵa múmkindik beredi. Barlyq seriktesti Kaspıı teńizindegi porttardyń qýatyn arttyrý, sondaı-aq júk kemelerin birlese óndirý úshin yntymaqtasa jumys isteýge shaqyramyn. BUU Eýropalyq ekonomıkalyq komıssııasy men ESKATO tarapynan tehnıkalyq jáne saraptamalyq turǵydan belsendi qoldaý kútemiz», – dedi Qasym-Jomart Toqaev.

Aıta keteıik, Sammıt barysynda Ázerbaıjan Prezıdenti Ilham Álıev, Qyrǵyzstan Prezıdenti Sadyr Japarov, Tájikstan Prezıdenti Emomalı Rahmon, Ózbekstan Prezıdenti Shavkat Mırzıeev, Grýzııa Premer-mınıstri Iraklıı Garıbashvılı, Majarstan Premer-mınıstri Vıktor Orban, Túrikmenstan Mınıstrler kabıneti tóraǵasynyń orynbasary Hodjamýrad Geldymýradov, BUU Eýropalyq ekonomıkalyq komıssııasynyń Atqarýshy hatshysy Tatıana Molchan, Azııa jáne Tynyq muhıty óńirlerine arnalǵan Ekonomıkalyq jáne áleýmettik komıssııasynyń Atqarýshy hatshysy (ESKATO) Armıda Salsııa Alıshahbana, sondaı-aq Shyǵanaqtaǵy arab memleketteri yntymaqtastyq keńesiniń Bas hatshysy Djasem Ál-Býdaıvı sóz sóıledi.

Memleket basshysy Q.Toqaev BUU-nyń Ortalyq Azııa elderi ekonomıkalaryna arnalǵan baǵdarlamasynyń (SPEKA) sammıtine qatysý úshin búgin Bakýge jumys saparymen barǵany jazǵan bolatynbyz. Aldymen, Qasym-Jomart Toqaev Ázerbaıjan Prezıdenti Ilham Álıevpen kezdesip, kelissóz júrgizdi.