Úsh jańa oblys qurylýyna baılanysty elimizdiń jańa kartasy jasaldy

ASTANA. QazAqparat – Qazaqstannyń saıası-ákimshilik kartasy ázirlendi. Bul týraly Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Áset Turysov aıtty, dep habarlaıdy QazAqparat tilshisi.

«Ótken jyly Memleket basshysynyń jarlyǵymen jańa úsh óńir – Abaı, Jetisý jáne Ulytaý oblystary quryldy. Osyǵan oraı Úkimet is-shara josparyn bekitip, ondaǵy tarmaqtardyń biri - Qazaqstan Respýblıkasynyń saıası kartasyn jáne jańa oblystardyń taqyryptyq kartasyn ózektendirý boldy», - dedi vıtse-mınıstr ortalyq kommýnıkatsııalar qyzmeti alańynda ótken baspasóz máslıhatynda.

Onyń atap ótýinshe, bul baǵytta qyrýar jumys istelgen.

«Áriptesterimiz úlken jumys atqaryp, 1:1 500 000 masshtabymen Qazaqstannyń saıası-ákimshilik kartasyn jasady. Qaraǵandy, Shyǵys Qazaqstan, Almaty oblystarynyń kartasy jańartylyp, 1 mln masshtabpen Abaı, Ulytaý jáne Jetisý oblystarynyń kartasy ázirlendi. Sonymen qatar 1:25 000 masshtabpen Qaraǵandy, Semeı, Óskemen qalalarynyń, 1:10 000 masshtabpen Jezqazǵan, Qonaev, Taldyqorǵan qalalarynyń jospar-syzbasy jańartyldy jáne jasaldy», - dedi Áset Turysov.