Úsh jaqty shart jaldamaly jumysshylardyń múddesine saı emes - M.Nárikbaev
Bul jaıynda «Ádilet» partııasynyń tóraǵasy Maqsut Nárikbaev Almatyda birneshe mekemeniń kásipodaǵymen áriptestik týraly memorandýmǵa qol qoıý rásiminde aıtty.
Onyń aıtýynsha, mundaı jaǵdaıda bul suraqtar kásipodaqtyń nazarynda bolyp, solardyń aralasýymen sheshilip otyrady. Sol sebepti, kásipodaqtar jalpy eńbekshilerdiń jáne belgili bir óndiris salasy jumysshylarynyń, kásibı mamandardyń múddesin belsendi túrde qorǵap otyrýy tıis. Alaıda bizdiń kásipodaqtar osy talaptarǵa saı emes kórinedi. «Qyzmetin resmı túrde atqarýshy kásipodaqtar, shyn mánisinde jumys berýshilerdiń múddesin kózdeıdi. Olar jasaǵan «jumys berýshi - kásipodaq- úkimet» úsh jaqty sharty jaldamaly jumysshylardyń múddesine saı emes. Sondyqtan bizde óndiristiń ár salasynda eńbek etýshi, biraq kásibı deńgeıi birkelki mamandar men qyzmetkerlerdiń, jumysshylardyń jalaqy kólemin taǵaıyndaýda alalaýshylyq oryn alýda», -deıdi M.Nárikbaev.
Partııa jetekshileri sonymen qatar, máseleniń ýshyǵýyna Qazaqstanda qoǵamdyq qurylymnyń qalyptasa qoımaýyn da alǵa tartýda. Oǵan sebep, turǵyndardyń belgili bir bóliginiń múddesin qorǵaýshy ınstıtýttar áli de qalyptasý jaǵdaıynda qalýda jáne qoǵamdyq ınstıtýttar arasynda óz ornyn taba almaýy. Al belgili bir óndiris oshaqtarynda jumysshylardyń múddesin qorǵaý úshin qurylǵan táýelsiz kásipodaqtardy Úkimet te, jumys berýshiler de moıyndamaı keledi.
M.Nárikbaev «Ádilet» partııasy kásipodaqtardy azmattyq qoǵamnyń mańyzdy ınstıtýty dep sanaıtyndyǵyn jetkizdi. «Olar jumysshylardyń quqyqtaryn jáne áleýmettik-ekonomıkalyq múddelerin qorǵaýǵa, jumys berýshiler men jumysshylardyń jáne memlekettiń ózara qatynasynda áleýmettik ádilettilik bolýyna qyzmet etedi», -deıdi ol.