Úsh tildilikti engizýdiń negizgi máni qazaq tilinde bolyp otyr - E. Saǵadıev

ASTANA. QazAqparat - Mektepterde úsh tilde bilim berý júıesin engizýdiń negizgi máni qazaq tilinde bolyp otyr. Búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Bilim jáne ǵylym mınıstri Erlan Saǵadıev osylaı málim etti.

«Qazirgi kúni orys tilindegi mektepterde qazaq tili oqytylǵanymen, ony bitirip shyqqan orys, qazaq jáne basqa ult ókilderiniń eshqaısysy da qazaqsha sóılep ketken joq. Buny jasyrýdyń qajeti de joq. Kóbisi qazaq tilinde sóılemek túgili ony túsinbeıdi de. Sondyqtan da, biz mindetti baǵdarlamalardyń josparynda Qazaqstan tarıhy men ádebıeti qazaq tilinde ótetin bolady. Bul Qazaqstannyń barlyq mektepterinde de osylaı júredi», - dedi E. Saǵadıev.

Osyǵan deıin habarlaǵandaı, mınıstr elimizde úsh tildi bilim berýge kóshýde esh kedergi bolmaýy kerek dep sanaıdy. «Biz 2019 jylǵa deıin joǵary synyptardy osy júıege kóshiretin bolamyz. Bir aıta ketetini, mektepte joǵary synyptarǵa tehnıkalyq mamandyqtar pánin aǵylshyn tilinde ótkize otyryp, oqýshynyń álemdik oqýdaǵy úderisterge yqpaldasýyna jaǵdaı jasaımyz. Bundaı yqpaldasý oqýshy úshin mindetti. Osylaısha, ol joǵary oqý oryndarynda da aǵylshyn tilinde oqytylatyn tehnıkalyq pánderge beıimdele bastaıdy», - degen bolatyn mınıstr E. Saǵadıev.