Úsh oblysta sán salony, farmatsevtıka kompanııalaryna asyl tuqymdy mal ósirýge sýbsıdııa berilgen
Bul týraly Sybaılas jemqorlyqqa qarsy is-qımyl agenttiginiń tóraǵasy Marat Ahmetjanovtyń Pavlodar oblysyna jumys sapary barysynda aıtyldy.
Sapar barysynda vedomstvo basshysy men oblys ákimi Ábilqaıyr Sqaqov Pavlodar oblysynyń Sıtýatsııalyq-taldaý ortalyǵynyń jumysymen tanysty.
Ortalyq jedel basqarý sheshimderin qabyldaý jáne óńir damýynyń asa mańyzdy kórsetkishterin monıtorıngileý, taldaý jáne boljaý úshin qurylǵan. Munda tóraǵa men aımaq basshysyna «E-nátıje» aqparattyq júıesiniń jumysy tanystyryldy. Sondaı-aq, agenttik tóraǵasy óńir aktıvimen keńes ótkizdi.
Marat Ahmetjanov agenttik qyzmetindegi basty basymdyq – sybaılas jemqorlyqtyń aldyn alý jáne eskertý ekenin atap ótti.
«Sybaılas jemqorlyq úshin jazanyń bultartpastyǵy qaǵıdatyn eshkim joıǵan joq dep erekshe atap ótkim keledi. Bul zulymdyqpen biz barynsha aıaýsyz kúresetin bolamyz», – dedi M. Ahmetjanov.
Vedomstvo basshysy barlyq memlekettik organdarda jobalyq basqarýdy engizý týraly taǵy bir talap baryn aıtty.
«Bul talap Úkimet qaýlysymen bekitilgen. Jobalyq basqarý júıesiniń negizgi baǵyttarynyń biri – «sybaılas jemqorlyqtyń aldyn alý jáne oǵan qarsy is-qımyl». Ony agenttik úılestiretin bolady», – dep atap ótti spıker.
Antıkor basshysy ınvestorlar men kásipkerlerge qyzmet kórsetý ortalyǵynyń jumysymen tanysyp, aýyl sharýashylyǵy salasyndaǵy aýyl sharýashylyǵy taýar óndirýshilerimen, «QazAgro» jáne mıkroqarjy uıymdarynyń ókilderimen kezdesý ótkizdi.
Marat Ahmetjanov Prezıdenttiń tapsyrmasy boıynsha agroónerkásiptik keshendegi sýbsıdııalaý salasyna júrgizilip jatqan aýqymdy taldaý týraly aıtyp berdi.
Atap aıtqanda, júrgizilip jatqan jumystyń aralyq nátıjesi usynyldy. Osy rette, aýyl sharýashylyǵy taýarlaryn óndirmeıtin kásiporyndarǵa sýbsıdııa tóleý faktileri anyqtaldy. Mysaly, Pavlodar, Túrkistan jáne Almaty oblystarynda aýyl sharýashylyǵy ónimderin óndirýge qatysy joq 279 kásipkerlik sýbektisine asyl tuqymdy mal sharýashylyǵyn qoldaý salasy boıynsha 1 mlrd teńgege jýyq sýbsıdııalar berildi. Olar: sulýlyq salondary, farmatsevtıkalyq kompanııalar, jyljymaıtyn múlikti jalǵa berý, avtokólikti jóndeý jáne t. b.
Sóz sońynda M.Ahmetjanov mundaı jaýapsyzdyqtyń jáne aýyl sharýashylyǵy basqarmalarynyń tarapynan baqylaý bolmaýynyń saldarynan jalpy sala zardap shegip otyrǵanyn aıtty. Óz kezeginde, kezdesýge qatysýshylar ótinim berýden bastap sýbsıdııa berilgenge deıingi aralyqta ashyqtyqty qamtamasyz etý boıynsha usynysyn jarııalady. Sondaı-aq, sýbsıdııa berý máselelerinde sybaılas jemqorlyq pen bıýrokratııa deńgeıin tómendetý, bıznesti júrgizýge kedergi keltiretin ákimshilik kedergilerdi joıý boıynsha sharalar usyndy.