Úsh oblys pen «Semeı ormany» rezervaty orman órtine daıyn emes
Qazaqstannyń soltústigi men batysynda sý tasqynymen kúresip jatqanda, birqatar óńirlerde órt qaýipti maýsymy bastaldy. Soltústik Qazaqstan oblysynan oralǵan vıtse-premer QR Ekologııa jáne tabıǵı resýrstar mınıstri Erlan Nysanbaevtyń, sondaı-aq QR Tótenshe jaǵdaılar mınıstri Shyńǵys Árinovtyń esebin tyńdady.
Búgingi tańda TJM-de 441 órt sóndirý bólimsheleri bar. Óńirlerde 230 erikti quralym, sondaı-aq jergilikti atqarýshy organdardyń 709 beketi quryldy. Vıtse-premer memlekettik órtke qarsy qyzmet joq jerde taǵy 49 órt sóndirý beketin qurýdy jedeldetýdi tapsyrdy.
«Órt qaýipti kezeńge daıyndyq sheńberinde 272,5 mln ga alańda ǵaryshtyq monıtorıng júrgizilýde, alaıda jer serikterden alynǵan derekter el aýmaǵy tolyq ushqannan keıin birneshe saǵattan keıin TJM stantsııasyna jiberiledi. Búginde TsDIAÓM vırtýaldy stantsııa qurý boıynsha jumys atqarylyp jatyr, bul órtti bekitý men ǵaryshtyq túsirilimdi spýtnıkten túsirý arasyndaǵy ýaqytty 20-40 mınýtqa deıin qysqartýǵa múmkindik beredi», - delingen habarlamada.
Orman qorynyń qaýipsizdigi jáne órt qaýpi bar maýsymǵa daıyndyq Prezıdent pen Úkimettiń erekshe baqylaýynda. Osylaısha, QR Ekologııa jáne tabıǵı resýrstar mınıstrligi 158 memlekettik orman ıelenýshini tekserdi. Tekserý qorytyndysy boıynsha vedomstvo basshysy Erlan Nysanbaev «Semeı ormany» rezervatynyń, sondaı-aq Pavlodar, Aqmola, Qostanaı oblystarynyń yqtımal órtterge daıyn emestigin málimdedi.
Kemshilikterdiń qatarynda JJM satyp alýdyń jáne rezerviniń joqtyǵy, orman órt sóndirý stantsııalary ǵımarattarynyń avarııalyq jaı-kúıi ne olardyń bolmaýy, órt sóndirý munaralarynyń jetispeýshiligi, arnaıy tehnıkanyń tozýy anyqtaldy.
Mysaly, Pavlodar oblysynda «Ertis Ormany» rezervatyn tekserý barysynda qolda bar patrýldik jáne órt sóndirýshilerdiń barlyǵy esepten shyǵarylatyny anyqtaldy. Sondaı-aq, jıi kezdesetin kemshilikterdiń taǵy bir legi — ratsııalardyń joqtyǵy jáne arnaıy kıimderdiń jetispeýshiligi.
Qanat Bozymbaev atap ótkendeı, ótken jylǵy «Semeı Ormany» rezervatynyń tragedııasy qaıtalanbaýy tıis jáne anyqtalǵan kemshilikterdi joıý boıynsha shuǵyl sharalar qabyldaýdy tapsyrdy.
«Abaı jáne Qostanaı oblystarynda bolǵan iri tabıǵı órtterdiń saldary áli de esimizde. Árbir qyzmetkerdi órtke qarsy arnaıy kıimmen, ratsııalarmen jáne qajetti qural-jabdyqtarmen mindetti túrde qamtamasyz etýge erekshe nazar aýdarǵym keledi», — dep atap ótti Qanat Bozymbaev.
Keńes qorytyndysy boıynsha vıtse-premer óńirlerdiń ákimdikterine bir apta kóleminde tabıǵı órtterdiń paıda bolý qaýpin tómendetý boıynsha óńirlik is-sharalar josparyn ázirleýdi jáne bekitýdi tapsyrdy.
«Oblys ákimderi óńirlik is-sharalar josparlaryn iske asyrýǵa derbes jaýapty», — dep eske saldy Qanat Bozymbaev.
Óńirlik is-sharalar josparyn iske asyrýdy baqylaý TJM-ge júktelgen bolatyn. Sondaı-aq, bir aptalyq merzimde TJM aerovızýaldy monıtorıng júrgizý jáne órtti sóndirý úshin usynylatyn tikushaq qyzmetteriniń kólemin ulǵaıtý boıynsha usynys engizý tapsyryldy.
Ekologııa mınıstrligine orman qory aýmaǵynda órtterdi aldyn ala anyqtaý júıesin ornatý ári orman jáne tabıǵatty qorǵaý mekemelerin materıaldyq-tehnıkalyq jabdyqtaý jumystaryn jandandyrýdy tapsyrdy.
Al, Іshki ister mınıstrligine ákimdiktermen birlesip, órt qaýpi joǵary kezeńde jeke tulǵalardyń orman qory aýmaǵynda bolýyna jol bermeý, onyń ishinde yqtımal órteýden saqtaý sharalaryn qabyldaý jáne mundaı faktiler anyqtalǵan jaǵdaıda jaýapkershilikke tartý jóninde tapsyrma qoıyldy.