Úsh kún boıy ózennen óte almaı júrgen: ShQO-da joǵalǵan 2 otbasy dron arqyly tabyldy
ShQO Polıtsııa departamenti baspasóz qyzmetiniń málimetine súıensek, tártip saqshylaryna joǵalǵan adamdardyń jaqyndary habarlasty.
Olardyń aıtýynsha, 30 tamyzda 37 jastaǵy óskemendik er adam jubaıymen, 10 jasar qyzy jáne dostarymen birge Glýbokoe aýdany Qaraǵojy aýylyna qaraı demalýǵa baryp, 1 qyrkúıekte oralýdy josparlaǵan. Alaıda sol kúnnen bastap múlde habar-osharsyz ketken.
«Aýdandyq polıtsııa bóliminiń jeke quramy tórt eresek adam men eki balany izdeýge jumyldyryldy. Oblystyq Polıtsııa departamenti apparatynyń qyzmetkerleri men qutqarýshylar birneshe topqa bólinip, aımaqty birge qarady. Sonymen qatar izdeý jumystaryna dron paıdalanyldy», - delingen aqparatta.
Sol arqyly eki otbasynyń ornalasqan jeri belgili boldy. Olar ózen deńgeıiniń kóterilip ketýinen bir orynda qalyp qoıǵanyn jetkizdi.
«Biz demalýǵa kelgen edik. Alaıda bir sátte ózen deńgeıi kóterildi. Úsh kún boıy bul ózennen óte almadyq. Abyroı bolǵanda, qazir bizde bári jaqsy. Іzdeýge qatysqandarǵa alǵysymyzdy bildiremiz», - deıdi otbasy músheleri.