Úsh kórshiles memleket sáýirge deıin Shardaraǵa 11,1 tekshe shaqyrym sý jibermek

<p>Keler jyldyń sáýirine deıin Shardara sý qoımasyna 11,1 tekshe shaqyrym sý keledi dep boljanyp otyr. Tashkentte ótken Memleketaralyq sý sharýashylyǵyn úılestirý komıssııasynyń 85-shi otyrysynda QR Sý resýrstary jáne ırrıgatsııa mınıstri Nurjan Nurjigitov kórshi eldermen osyndaı kelisimge keldi, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttiginiń menshikti tilshisi.&nbsp;</p>

«Eki kún boıy Tashkent qalasynda Memleketaralyq sý sharýashylyǵyn úılestirý komıssııasynyń otyrysy ótti. Kún tártibinde tórt másele qaraldy: 2022-2023 jyldardaǵy vegetatsııalyq kezeńderdiń qorytyndysyn shyǵarý, 2023-2024 jyldarǵa arnalǵan bizdiń boljam, 2018 jyly ótken Túrikmenbashy qalasynda jáne bıyl Dýshanbede ótken Aral teńizin qorǵaý boıynsha memleket basshylary bergen tapsyrmalardyń oryndalý barysy talqylandy. Biz búkil aımaq úshin óte mańyzdy máselelerdiń tıimdi sheshimin tabý úshin talqylaý jasadyq. Atap aıtqanda, Syrdarııa men Ámýdarııa ózenderinen sý alý kólemi boıynsha kelisimge keldik. Bul máselede biz kúsh-jigerimizdi jumyla kiriskende ǵana Ortalyq Azııada sý resýrstaryn utymdy paıdalaný men únemdeýdi qamtamasyz ete alamyz», - dedi Nurjan Nurjigitov otyrystan keıin Ózbekstandaǵy qazaqstandyq menshikti tilshilerdiń saýalyna jaýap bere otyryp.

Málim bolǵandaı, sáýirge deıin «Dostyq» memleketaralyq kanaly boıynsha da 487 mln tekshe metr sý alý josparlanǵan. Bul Túrkistan jáne Qyzylorda oblystarynda 2024 jyldyń vegetatsııalyq kezeńine qajetti sý kólemin jınaqtaýǵa, sondaı-aq Aral teńizine 1,6 mlrd tekshe metr sý jiberýge múmkindik beredi.

Budan bólek, Memleketaralyq sý sharýashylyǵyn úılestirý komıssııasynyń músheleri «Syrdarııa» ózeni basseınindegi sý qoımalary kaskadynyń jumysyna monıtorıng júrgizý jáne boljamnan aýytqý anyqtalǵan jaǵdaıda Qazaqstan, Tájikstan jáne Ózbekstan taraptaryn dereý habardar etý jóninde tapsyrma berdi.

Sonymen qatar Memleketaralyq sý sharýashylyǵyn úılestirý komıssııasynyń otyrysy endi jylyna 2 emes, 4 ret ótpek. Kelesi jıyn Astana qalasynda uıymdastyrylady.