Úsh qalada salynatyn JEO-ǵa zeınetaqy qorynyń aqshasy jumsalmaıdy – Úkimet

<p>ASTANA. KAZINFORM &mdash; Úkimet basshysynyń birinshi orynbasary Roman Sklıar Semeı, Kókshetaý, Óskemen qalalarynda salynatyn jylý elektr ortalyqtaryna BJZQ qarajaty salynbaıtynyn aıtty.</p>

Búgin Úkimettiń keńeıtilgen otyrysynan keıin tilshiler Kókshetaý, Semeı, Óskemen qalalarynda jylý elektr ortalyǵyn salýǵa nelikten reseılik ınvestorǵa tańdaý túskenin surady.

«Jylý elektr ortalyqtaryna qatysty joba ınvestorlar qarajaty esebinen iske asyrylady. Tıisti kelisimshartqa shetel kompanııasy qol qoıdy. ıAǵnı, «Samuryq Energo» men reseılik «Inter RAO» kompanııalary júzege asyrady. Reseılik tehnologııalar qoldanylady. Atap aıtqanda, bastapqyda qazandyqtarda kómir jaǵady, keıinnen olar gazǵa aýystyrylady. Kókshetaýǵa gaz qubyry tartylǵan kezde, osy kómir stansalarynda gaz jaǵylady», - dedi Roman Sklıar.

Bul rette ol atalǵan jobalarǵa qarajatty ınvestor salatynyn naqtylady.

«Bul jobalarǵa zeınetaqy qorynyń qarajaty jumsalmaıdy. Oǵan sheteldik ınvestorlardyń qarajaty tartylady. Bul qarjy tarıf esebinen qaıtarylady», - dedi Úkimet basshysynyń birinshi orynbasary.

Onyń sózine qaraǵanda, birinshi salynatyn Kókshetaýdaǵy stantsııanyń tehnıkalyq-ekonomıkalyq negizdemesi bar. Odan keıin Semeı men Óskemendegi jobalar iske asyrylady.

Aıta keteıik, Kókshetaýda JEO qurylysynyń orny anyqtaldy.