Úsh elge sý, elektr energııasyn jetkizý máselesi talqylandy

ASTANA. QazAqparat – Tashkentte Qazaqstan, Qyrǵyz Respýblıkasy jáne Ózbekstan energetıkalyq vedomstvolary basshylarynyń kezdesýi ótti, dep habarlaıdy QazAqparat Energetıka mınıstrligine silteme jasap.

Taraptar kúzgi-qysqy kezeńde elektr energııasyn josparly jetkizýge, vegetatsııalyq kezeńde elderdiń sharýa qojalyqtaryn sýarmaly sýmen qamtamasyz etýge, sondaı-aq Qambarata GES-1 qurylysy boıynsha birlesken jobany iske asyrýǵa qatysty birqatar máselelerdi talqylady.

Atap aıtqanda, mınıstrler elderdiń energetıkalyq obektileriniń kúzgi-qysqy kezeńge daıyndyǵyn, ózara rezervteýdi, elektr qýatyn retteýdi jáne josparly jetkizýdi, onyń tranzıtin qamtamasyz etýdi taldady.

Qazaqstannyń energetıka mınıstri Almasadam Sátqalıev kezdesý qorytyndysyna túsinikteme bere otyryp: «Bizde bul másele boıynsha tolyq túsinistik boldy. Kúzgi-qysqy eń joǵary júktemelerden sátti ótý úshin úılestirý jáne birlesken kelisilgen qyzmet qajet ekenin bári túsinedi», - dep atap ótti.

Sondaı-aq vegetatsııalyq kezeńde elderdi sýarmaly sýmen qamtamasyz etý máselesi qaraldy. Sý sharýashylyǵy vedomstvolarynyń basshylary sýdy qajetti kólemde jetkizý boıynsha buryn alynǵan barlyq mindettemeni rastady.

Qazaqstan, Ózbekstan jáne Qyrǵyzstan energetıkalyq vedomstvolarynyń basshylary Qambarata GES-1 birlesken qurylysy jobasyn talqylaý kezinde óńirge taza elektr energııasyn jetkizýdi ulǵaıtý, sondaı-aq elderdi turaqty sýmen qamtamasyz etý maqsatynda ony iske asyrýdyń mańyzyn atap ótti.

«Budan basqa, biz óńirdiń energetıkalyq júıelerin damytý josparlaryn talqyladyq. Qazaqstanda da, Ózbekstanda da, Qyrǵyzstanda da jańa býyndy, onyń ishinde JEK salý boıynsha aýqymdy josparlar jetkilikti. Bul jańa rejımderdi qurýdy, jańa jelilerdi, sonyń ishinde memleketaralyq elektr berý jelilerin, kishi stantsııalardy qurýdy talap etedi. Biz osy máselelerdiń barlyǵyn úılestiretin, biryńǵaı energetıkalyq júıemizdiń ońtaıly damýyn, aǵymdardyń ońtaıly rejımderin, generatsııany paıdalaný, ózara rezervteý máselelerin qamtamasyz etetin biryńǵaı jumys tobyn qurý jóninde kelistik», - dedi A.Sátqalıev.

Kezdesý barysynda qol jetkizilgen barlyq ýaǵdalastyq týraly Qazaqstan, Ózbekstan jáne Qyrǵyzstan Úkimeti basshylaryna jeke baıandalatyn bolady.