Úsh balasyna 2 mln teńgeden astam alıment tólemegen atyraýlyq qamaýda otyr

<p>Atyraý oblysynda alımentin tólemegen er adam ákimshilik qamaýǵa alyndy. Boryshker áke úsh balasyna 2 mln teńgeden astam alımentin tólemeı júrgen, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Úsh balasyna 2 mln 75 myń teńge alımentin tólemeı júrgen boryshker áke Mahambet aýdanynda turady.

Oǵan qatysty ákimshilik quqyq buzýshylyq týraly is aýdandyq sotta qaraldy.

«Mahambet aýdandyq sotynyń 2022 jylǵy 18 naýryzdaǵy buıryǵyna sáıkes, boryshker B.A-dan kámeletke tolmaǵan úsh balasyn asyrap-baǵý úshin aılyq tabysynyń jáne ózge de kirisiniń teń jartysy mólsherinde alıment óndirilgen. Alaıda, B.A. sot buıryǵyn oryndamaı, alıment tólemegen. Onyń alıment bereshegi — 2 mln 75 myń 862 teńge. Osyǵan baılanysty B.A-ǵa qatysty Ákimshilik quqyq buzý týraly kodekstiń 669-babynyń 1-bóligimen ákimshilik is qaraldy», -dep habarlady aýdandyq sottan.

Aýdandyq sottyń otyrysynda boryshker áke B.A. óz kinásin tolyq moıyndaǵan.

Sot qaýlysymen B.A. aıyp taǵylǵan bappen kináli dep tanylyp, 3 táýlikke ákimshilik qamaqqa alyndy.

Sot qaýlysy zańdy kúshine endi.

Eske sala ketelik, budan buryn Atyraý oblysynyń úsh turǵyny mal urlaǵany úshin sottalǵanyn habarlaǵan bolatynbyz.